ޖަރުމަނުގެ ބަޔާން މިއުނިކަށް ކުޅެމުން އަންނަ ކެނެޑާގެ ޑިފެންޑަރު އަލްފަންސޯ ޑޭވިސް އެ ކުލަބުގައި ބެހެއްޓުމަށް ބާރު އަޅާނެ ކަމަށް ބަޔާންގެ ޑައިރެކްޓަރު ކްރިސްޓޮފް ފްރެއުންޑް ވިދާޅުވެއްޖެ އެވެ.

އުމުރުން 23 އަހަރުގެ ޒުވާން ޑިފެންޑަރު ބަޔާނަށް ބަދަލުވީ 2019 ވަނަ އަހަރު އެވެ. އެ ކުލަބާއެކު އެންމެ ފަހުން އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގައި ބާާކީ އެއް އަހަރު އޮތްއިރު، ބައެއް ކުލަބުތަކުން އޭނާ ހޯދުމުގެ ޝައުޤުވެރިކަން ގެންގުޅެ އެވެ. މިއަހަރުގެ ކުރީ ކޮޅު ބަޔާނުން ވަނީ ޑޭވިސް އަށް އައު އެއްބަސްވުމެއް ވެސް ހުށަހަޅައިފަ އެވެ. ނަމަވެސް އެކަމާ ޑޭވިސް ވަކި ގޮތެއް ނުނިންމަ އެވެ.

ޑޭވިސްގެ ކުރިމަގާ ގުޅޭ ގޮތުން ކުރިމަތިވަމުން އަންނަ ސުވާލުތަކަށް ޖަވާބު ދެމުން ފްރެއުންޑް ވިދާޅުވީ، އައު އެއްބަސްވުމުގެ ކަންތަކުގައި މަޝްވަރާ ކުރެވެމުން އަންނަ ކަމަށެވެ. ބަޔާނާއި، ޑޭވިސްއާ ދެމެދު ކުރެވެމުން އަންނަ މަޝްވަރާތަކުގައި މިހާތަނަށް ވަކި ގޮތެއް ނިމިފައި ނުވާ ކަމަށް ނުވަތަ އެއްބަސްވުމަކަށް އާދެވިފައި ނުވާ ކަމަށް ވެސް އޭނާ ވަނީ ވިދާޅުވެފަ އެވެ.

މީގެ އިތުރުން ފްރެއުންޑް ވިދާޅުވީ މިހާތަނަށް އެއްވެސް ދޮރެއް ބަންދުވެފައި ނުވާ ކަމަށާއި، އެކަމަށް އަދި ވަގުތު އޮތް ކަމަށެވެ. އެކަމާ ގުޅޭ މަޝްވަރާތައް އަދިވެސް ކުރިއަށް ގެންދާނެ ކަމަށާއި، ނިންމުން އަންނާނެ ގޮތެއް ކުރިއަށް އޮތް މަސްތަކުގައި ބަލަން ޖެހޭނެ ކަމަށެވެ. އަދި ޑޭވިސް ބަޔާންގައި ބަހައްޓަން ކުލަބުން ވެސް، އަދި އޭނާ އަށް ބާރު އަޅުއްވާނެ ކަމަށް ފްރެއުންޑް ވަނީ ވިދާޅުވެފަ އެވެ.

ޑޭވިސް ވަނީ މިހާތަނަށް ބަޔާނަށް 196 މެޗު ކުޅެދީ 11 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ 13 ތައްޓެއް ކާމިޔާބު ކޮށްފަ އެވެ.