ޑޭވިސް ކަޕް: ފައިނަލްގައި ވާދަކުރާނީ ބެލްޖިއަމް އާއި ފްރާންސް

ދުނިޔޭގެ ގައުމުތަކުގެ ގައުމީ ޓެނިސް ޓީމުތަކުގެ މެދުގައި ކުޅޭ ޑޭވިސް ކަޕްގެ މިއަހަރުގެ ފައިނަލްގައި ވާދަކުރާ ޓީމުތައް ކަށަވަރު ވެއްޖެއެވެ.

ނޮވެމްބަރު މަހު ކުޅެން ހަމަޖެހިފައިވާ ޑޭވިސް ކަޕްގެ ފައިނަލްގައި ވާދަކުރާނީ ފްރާންސްއާ ބެލްޖިއަމްއެވެ. ޑޭވިސް ކަޕްގެ ފޯމެޓް އޮންނަ ގޮތުން ކޮންމެ ޓީމަކުން ވެސް ފަސް މެޗު ކުޅެން ޖެހޭއިރު ކޮލިފައި ވުމަށް އޭގެ ތެރެއިން ތިން މެޗު ކާމިޔާބުކުރަން ޖެހެއެވެ.

މި މުބާރާތުގެ ފައިނަލްއިން ބެލްޖިއަމް ޖާގަ ހޯދީ ތިން މެޗު ދެ މެޗުން އޮސްޓްރޭލިއާ ބަލިކޮށްގެންނެވެ. ފިރިހެން ސިންގަލްސް ފުރަތަމަ މެޗުގައި ބެލްޖިއަމްގެ ޑޭވިޑް ގޮފިން ތިން ސެޓު އެއް ސެޓުން އޮސްޓްރޭލިއާގެ ޖޯން މިލިމަން ބަލިކުރި ނަމަވެސް ދެވަނަ މެޗުގައި އޮސްޓްރޭލިގެ ނިކް ކިރްގިއޯސް ވަނީ ބެލްޖިއަމްގެ ސްޓީވް ޑާސިސް ތިން ސެޓު ދެ ސެޓުން ބަލިކޮށް އޮސްޓްރޭލިއާ އަށް ނަތީޖާ ހަމަހަމަ ކޮށްދީފައެވެ.

ފިރިހެން ޑަބަލްސް މެޗުގައި އޮސްޓްރޭލިއާގެ ޖޯން ޕިއާސްއާ ޖޯޑަން ތޮމްޕްސަން ސީދާ ތިން ސެޓުން ބެލްޖިއަމްގެ ރުބެން ބެމެލެމެންސްއާ އަރްތޫރް ޑެ ގްރީފް ބަލިކޮށް ލީޑު ނެގިއެވެ. އެހެނަސް ބެލްޖިއަމްގެ ޑޭވިޑް ގޮފިން ވަނީ ހަތަރު ވަނަ މެޗުގައި ތިން ސެޓު އެއް ސެޓުން އޮސްޓްރޭލިއާގެ ނިކް ކިރްގިއޯސް ބަލިކޮށް ބެލްޖިއަމްއަށް ނަތީޖާ ހަމަހަމަ ކޮށްދީފައެވެ. ސެމީފައިނަލްގެ ނަތީޖާ ނެރެން ކުޅުނު ފަސް ވަނަ މެޗުގައި ބެލްޖިއަމްގެ ސްޓީވް ޑާސިސް ވަނީ ސީދާ ތިން ސެޓުން އޮސްޓްރޭލިއާގެ ޖޯޑަން ތޮމްޕްސަން ބަލިކޮށް ބެލްޖިއަމްއަށް ފައިނަލްގެ ޖާގައެއް ކަށަވަރު ކޮށްދީފައެވެ.

ސެމީ ފައިނަލްގެ ދެވަނަ މެޗުގައި ފްރާންސްއިން ވަނީ ތިން މެޗު އެއް މެޗުން ސާބިއާ ބަލިކޮށް މުބާރާތުގެ ފައިނަލްގެ ޖާގައެއް ކަށަވަރު ކޮށްފައެވެ. އެގޮތުން ސިންގަލްސް ފުރަތަމަ މެޗުގައި ސާބިއާގެ ޑޫސާން ލަޖޮވިޗް ވަނީ ތިން ސެޓު އެއް ސެޓުން ފްރާންސްގެ ލޫކަސް ޕޮލީ ބަލިކޮށް އެ ޓީމަށް ލީޑު ނަގައިދީފައެވެ. އެހެނަސް ފްރާންސްއިން ވަނީ ފަހުން ކުޅުނު ތިން މެޗު ވެސް ކާމިޔާބުކޮށްފައެވެ.

ފްރާންސްގެ ޖޯ ވިލްފްރީޑް ޓްސޮންގާ ވަނީ ދެވަނަ މެޗުގައި ސާބިއާގެ ލާސްލޯ ޑެރޭ ސީދާ ތިން ސެޓުން ބަލިކޮށްފައެވެ. އަދި ޑަބަލްސް މެޗުގައި ފްރާންސްގެ ޕިއާ ހިއުސް ހާބާޓްއާ ނިކޮލަސް މަހުޓް ވަނީ ސީދާ ތިން ސެޓުން ސާބިއާގެ ފިލިޕް ކްރަޖިނޮވިޗްއާ ނެނަޑް ޒިމޮންޖިޗް ބަލިކޮށްފައެވެ. ފްރާންސްއަށް ފައިނަލްގެ ޖާގައެއް ކަށަވަރުވީ ހަތަރު ވަނަ މެޗުގައި އެ ޓީމުގެ ޖޯ ވިލްފްރީޑް ޓްސޮންގާ ތިން ސެޓު އެއް ސެޓުން ސާބިއާގެ ޑޫސާން ލަޖޮވިޗް ބަލިކުރުމުންނެވެ.

ޑޭވިސް ކަޕްގެ ފައިނަލްއިން މި ދެ ޓީމު ޖާގަ ހޯދާފައިވާއިރު ފްރާންސްއިން ވަނީ މީގެ ކުރިން ނުވަ ފަހަރު މި މުބާރާތް ކާމިޔާބުކޮށްފައެވެ. ބެލްޖިއަމްއިން މި މުބާރާތުގައި ހޯދާފައިވާ އެންމެ ބޮޑު ކާމިޔާބަކީ 2015 އަހަރުގެ މުބާރާތުން ދެވަނަ ލިބުމެވެ. މިއަހަރުގެ ޑޭވިސް ކަޕްގެ ފައިނަލް ކުޅެން ހަމަޖެހިފައިވަނީ 24 ނޮވެމްބަރުގައެވެ.