މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ހާޝިމް މަގާމުން ވަކި ކުރުމަށް ރައީސުލްޖުމްހޫރިއްޔާއަށް ލަފާ ދިނުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފިއެވެ.
މާލިއްޔަތު ކޮމިޓީން އެގޮތަށް ފާސްކޮށްފައިވަނީ ބުދަ ދުވަހުއެވެ. އެއީ ކޮމިޓީގައި ތިއްބެވި މެމްބަރުންގެ އިއްތިފާޤުންނެވެ. ދެން އޮންނާނީ މިކަމުގައި މަޖިލީހުގެ ތަޅުމުން ގޮތެއް ނިންމުމެވެ.
އާލާސްކަންފުޅާ އުޅުއްވާކަމަށް ވިދާޅުވެ މާލިއްޔަތު ކޮމިޓީއަށް ގަވަރުނަރު ވަޑައިގެންފައި ނުވި ނަމަވެސް ލިއުމުން މަޖިލީހަށް ޖަވާބުދާރީވެފައިވެއެވެ. އެގޮތުން ރާއްޖެއަށް އިގްތިސާދީ ކާރިސާއެއް ކުރިމަތިވީ ސަރުކާރަށް ދިން އިރުޝާދުތަކާ އެއްގޮތަށް އަމަލުނުކުރުމުން ކަމަށާއި، އެ މައުލޫމާތުތައް ހިއްސާ ނުކޮށް އޮވެގެންނެއް ނޫންކަމަށް ގަވަރުނަރު ވިދާޅުވެފައިވެއެވެ.
އަލީ ހާޝިމް މަގާމުން ވަކި ކުރުމަށް ރައީސަށް ލަފާ ދިނުމަށް މެމްބަރުން ނިންމާފައިވަނީ އެމްއެމްއޭގެ އެންމެ އިސްވެރިޔާގެ ހައިސިއްޔަތުން މަސްއޫލިއްޔަތުތައް އެންމެ ފުރިހަމަ އަށް އަލީ ހާޝިމް އަދާނުކުރައްވާ ކަމަށް ވިދާޅުވެއެވެ.
