ކޮޕާ އެމެރިކާ ކާމިޔާބުކޮށް، އާޖެންޓީނާ އަށް ޖެހި ޖެހިގެން ހަތަރު ވަނަ ތަށި

އެމެރިކާގައި ކުރިއަށް ދިޔަ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގެ ފައިނަލްގައި ކޮލަމްބިއާ ބަލިކޮށް، އާޖެންޓީނާ އިން މުބާރާތުގެ ތަށި ދިފާއު ކޮށްފި އެވެ.

ހޯމަ ދުވަހުގެ ފަަތިހު ހާޑް ރޮކް ސްޓޭޑިއަމްގައި ކުޅުނު މެޗު އާޖެންޓީނާ އިން ކާމިޔާބު ކޮށްފައި ވަނީ 1-0ންނެވެ. މެޗުގައި އާޖެންޓީނާ އިން ލަނޑު ޖެހީ މެޗުގެ 90 މިނެޓުގެ ކުޅުން ހަމަވެ، އިތުރަަށް ކުޅުނު 15 މިނެޓުގެ ދެ ހާފުގަ އެވެ. އޭގެ ތެރެއިން ވެސް ފަހު ހާފުގައި އާޖެންޓީނާ އިން ވަނީ ލަނޑު ޖަހައިފަ އެވެ.

ފަތިހު ފަހެއް ޖަހާއިރު ފަށަން އޮތް މެޗު ފެށުން ވަނީ ވަރަށް ބޮޑަށް ލަސްވެފަ އެވެ. އެއީ މެޗަށް ވަނުމަށް ޓިކެޓު ނަގާފައި ނެތް އެތައް ސަޕޯޓަރުންތަކެއް ދަނޑެއް ވަދެ، ހަމަ ނުޖެހުންތަކެއް ހިންގުމުގެ ސަބަބުންނެވެ. މެޗުގެ ކުރިން ހިނގައިދިޔަ އެ ހަމަ ނުޖެހުގައި ބައެއް ސަޕޯޓަރުންނަށް ވަނީ އަނިޔާ ވެސް ވެފަ އެވެ.

މެޗުގެ ދެ ވަނަ ހާފުގައި އާޖެންޓީނާ އިން ވަނީ އެ ޓީމުގެ ކެޕްޓަން ލިއޮނަލް މެސީ ބަދަލުކޮށްފަ އެވެ. މެޗުގެ 66 ވަނަ މިނެޓުގައި މެސީ ބަދަލު ކޮށްފައި ވަނީ އޭނާގެ ފައިގެ ކުޑަ ހުޅަށް ލިބުނު އަނިޔާއެއްގެ ސަބަބުންނެވެ. މެސީގެ ބަދަލުގައި ކުޅެން ނިކުތީ ނިކޮލަސް ގޮންޒާލޭޒް އެވެ. މެޗުގެ އިތުރު ވަގުތުގެ ފަހު ހާފުގައި އާޖެންޓީނާ މޮޅުކޮށްދިން ލަނޑު ޖެހީ ލައުޓާރޯ މާޓިނޭޒް އެވެ. މެޗުގައި އޭނާ ވެސް ކުޅެން އެރީ ބަދަލު ކުޅުންތެރިޔެއްގެ ގޮތުގަ އެވެ.

އެއާއެކު އާޖެންޓީނާ އިން ވަނީ ޖެހި ޖެހިގެން ދެ ވަނަ ފަހަރަށް ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ކާމިޔާބު ކޮށްފަ އެވެ. އަދި މިއީ އާޖެންޓީނާ އިން ޖެހި ޖެހިގެން ކާމިޔާބު ކުރި ހަތަރު ވަނަ ތައްޓެވެ. އާޖެންޓީނާ އިން ވަނީ 2021 ވަނަ އަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ކާމިޔާބު ކޮށްފަ އެވެ. އޭގެ ފަހުން ބައްރުތަކުގެ މެދުގައި ކުޅޭ ފައިނަލިސިމާ ކާމިޔާބު ކުރިއިރު، 2022 ވަނަ އަހަރުގެ ފީފާ ވޯލްޑް ކަޕް ކާމިޔާބު ކުރި އެވެ. އޭގެ ފަހުން ރަނގަޅު ފޯމެއްގައި ނިކުމެ އާޖެންޓީނާ އިން މި ވަނީ މިއަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ވެސް ކާމިޔާބު ކޮށްފަ އެވެ.

އަނެއްކޮޅުން މިއީ އާޖެންޓީނާ އިން ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ކާމިޔާބު ކުރި 16 ވަނަ ފަހަރެވެ.