ރަޝިއާގެ ހަނގުރާމަމަތީ ދެ މަނަވަރު އަސްކަރީ ތަމްރީން ތަކަށް ޗައިނާ އަށް
13 ޖުލައި 2024 | ހޮނިހިރު 13:45ރަޝިއާ އިން ޔޫކްރެއިނަށް އެރި ހިސާބުން ދެ ގައުމުގެ ގުޅުން ވަރަށް ބޮޑަށް ވަނީ ބަދަހިވެފައެވެ.
މި ދެ މަނަވަރު ޗައިނާ އަށް ދިޔައީ ޗައިނާ އާއި ރަޝިއާ ގުޅިގެން ބާއްވާ އަސްކަރީ ތަމްރީންތަކެއް ގައި ބައިވެރިވުމަށް
ރަޝިއާގެ ހަނގުރާމަ މަތީ ދެ މަނަވަރު ޗައިނާގެ ޕޯޓް ސިޓީ ޒަންގްޖިއާން ގައި ބަނަދަރު ކޮށްފިއެވެ.
ރަޝިއާ ގެ ދިފާއީ ވުޒާރާ އިން ހޮނިހިރު ދުވަހު ބުނީ މި ދެ މަނަވަރު ޗައިނާ އަށް ދިޔައީ ޗައިނާ އާއި ރަޝިއާ ގުޅިގެން ބާއްވާ އަސްކަރީ ތަމްރީންތަކެއް ގައި ބައިވެރިވުމަށް ކަމަށެވެ.
ރަޝިއާ އިން ޔޫކްރެއިން އަށް 2022 ގެ ފެބްރުއަރީ ގައި އެރި ހިސާބުން ރަޝިއާ އާއި ޗައިނާގެ ގުޅުން ވަރަށް ބޮޑަށް ބަދަހިވަމުން ގޮސްފައިވާ ކަން ފާހަގަ ކުރެވެއެވެ.
ރަޝިއާ ޗައިނާގެ ގުޅުން ބަދަހި ކުރުމުގެ މަގްސަދަކަށް ވެފައިވަނީ، ބައިނަލް އަގްވާމީ މައިދާނުގައި އެމެރިކާ އާއި ހުޅަނގުގެ ގައުމު ތަކުން އަދާ ކުރަމުން އަންނަ ދައުރަށް ހީނަރުކަން ގެނައުމެވެ.
ޗައިނާ އާއި ރަޝިއާ ގުޅިގެން ބާއްވާ މި އަސްކަރީ ތަމްރީން ތަކުގެ ފުރަތަމަ ބުރު އޮންނާނީ ހޯމަ ދުވަހުން ބުރާސްފަތި ދުވަހަށް ކަމަށާއި، ތަމްރީންތަކުގައި އެންޓި އެއަރ އެންޓި ސަބްރީން ހަމަލާތަކަށް ފަރިތަކުރުން ތަމްރީން ތަކުގައި ހިމެނޭ ކަމަށް ރަޝިއާގެ އަސްކަރިއްޔާގެ ބަޔާނުގައި ވެއެވެ.
ރަޝިއާ އާއި ޗައިނާ ގުޅިގެން އަސްކަރީ ތަމްރީންތައް ގަވައިދުން ބާއްވަމުން ދިޔަ ކަމުގައި ވިޔަސް ނޭޓޯ ފަދަ އަސްކަރީ ބާރަކާ އަދި މި ދެގައުމުގެ އަސްކަރީ ފެންވަރު ހަމަހަމަ ނުކުރެވޭނެ ކަމަށް ޔޫރަޕިއަން ޔުނިއަން އިންސްޓިޓިއުޓް ފޯ ސެކިއުރިޓީ ސްޓަޑީޒް އިން ޖުލައި މަހު ނެރުނު ރިޕޯޓެއްގައި ފާހަގަ ކޮށްފައި ވެއެވެ.
