ބެންފީކާ އަށް ކުޅެމުން އަންނަ އާޖެންޓީނާގެ އެޓޭކިން މިޑްފީލްޑަރު އެންހެލް ޑި މާރިއާ، އިތުރު އެއް އަހަރަށް އެ ކުލަބުގައި މަޑު ކުރާނެ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 36 އަހަރުގެ ޑި މާރިއާ އެންމެ ފުރަތަމަ ބެންފީކާ އަށް ކުޅުނީ 2007 ވަނަ އަހަރުން 2010 ވަނަ އަހަރަށެވެ. އޭގެ ފަހުން، ދެ ވަނަ ފަހަރަށް އޭނާ ބެންފީކާ އަށް ބަދަލުވީ 2023 ވަނަ އަހަރު އެވެ. އިޓަލީގެ ޔުވެންޓަސްގައި ހުރުމަށްފަހު، ޑި މާރިއާ ބެންފީކާ އަށް ބަދަލުވީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު މި ހިނގާ ޖުލައި މަހަށް ހަމަވާނެ އެވެ.

އެހެން ނަމަވެސް، މީޑިއާ ތަކުގައި ބުނެފައިވާ ގޮތުން ޑި މާރިއާ ވަނީ އިތުރު އެއް އަހަރަށް ބެންފީކާގައި މަޑު ކުރަން އެއްބަސްވެފަ އެވެ. އެއީ އޭނާ އެ ކުލަބުގައި ބަހައްޓަން ކުލަބުގެ ވެރިން ބޭނުންވާތީ އެވެ. ބެންފީކާ އިން ޑި މާރިއާ އަށް ހުށަހަޅާފައިވާ އިތުރު އެއް އަހަރުގެ އެއްބަސްވުން އޭނާ ޤަބޫލު ކޮށްފައިވާ ކަމަށް ވެސް ރިޕޯޓުތައް ބުނެ އެވެ. އެހެންކަމުން، ކުރިއަށް އޮތް ދުވަސްތަކުގައި ބެންފީކާގެ އައު އެއްބަސްވުމުގައި އޭނާ ސޮއި ކުރާނެ އެވެ. އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖުލައި މަހުގެ ނިޔަލަށެވެ.

ޑި މާރިއާ ވަނީ ދެ ވަނަ ފަހަރަށް ބެންފީކާ އަށް ބަދަލުވެ އެ ކުލަބަށް ކުޅެދިން 48 މެޗުގައި 17 ލަނޑު ޖަހައިފަ އެވެ. އޭނާ ވަނީ ދެ ފަހަރުގެ މަތިން ބެންފީކާ އަށް ކުޅެދިން 173 މެޗުގައި 32 ލަނޑު ޖަހައިފަ އެވެ. ބެންފީކާ އާއެކު ޑި މާރިއާ ވަނީ ހަތަރު ތައްޓެއް ކާމިޔާބު ކޮށްފަ އެވެ. އޭގެ ތެރެއިން އެއް ތައްޓަކީ، ދެ ވަނަ ފަހަަރަށް އެ ކުލަބަށް ބަދަލުވެ، އެ ކުލަބާއެކު އޭނާ ހޯދާފައިވާ ތައްޓެކެވެ.

އާޖެންޓީނާ ޤައުމީ ޓީމަށް ކުޅެމުން އަންނަ ޑި މާރިއާ ވަނީ، މިހާރު އެމެރިކާގައި ކުރިއަށްދާ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) އަށް ފަހު ޤައުމީ ޓީމަށް ކުޅުން ހުއްޓާލަން ނިންމައިފަ އެވެ. އެހެންކަމުން، ބައިނަލްއަޤުވާމީ ފެންވަރުގައި ޑި މާރިއާ ކުޅޭ އެންމެ ފަހު މެޗަކީ، ހޯމަ ދުވަހުގެ ފަތިހު ކޮލަމްބިއާއާ ދެކޮޅަށް ކުޅޭ ދެކުނު އެމެރިކާ ސަރަހައްދުގެ ފައިނަލް މެޗެވެ. ޤައުމީ ޓީމަށް ކުޅުން ހުއްޓާލަން ނިންމިޔަސް، ޑި މާރިއާގެ ވިސްނުމުގައި ހުރީ ކުލަބު ފެންވަރުގައި ކުޅުމަށެވެ.