އެމެރިކާ ޤައުމީ ޓީމުން ލިބުނު ފުރުސަތު ކްލޮޕް ދޫކޮށްލައިފި

އެމެރިކާ ޤައުމީ ފުޓުބޯޅަ ޓީމާ ހަވާލުވާން ލިބުނު ފުރުސަތު، ޖަރުމަނުގެ ތަޖުރިބާކާރު ކޯޗު ޔާގަން ކްލޮޕް ދޫކޮށްލައިފި އެވެ.

އެމެރިކާ ޤައުމީ ޓީމުގައި އެންމެ ފަހުން ހުރީ ގްރެގް ބާހޯލްޓާ އެވެ. އެމެރިކާގައި މިހާރު ކުރިއަށްދާ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) އިން އެ ޤައުމު ކެޓުމާއެކު، އެމެރިކާ އިން ވަނީ ބާހޯލްޓާ މަގާމުން ވަކި ކޮށްފަ އެވެ. އެއަށްފަހު އެ ޤައުމުން އަންނަނީ އައު ކޯޗެއް ހޯދުމުގެ މަސައްކަތް ކުރަމުންނެވެ. އެއީ މީގެ ދެ އަހަރު ފަހުން، 2026 ވަނަ އަހަރުގެ އެ ޤައުމުގައި އޮންނަ ފީފާ ވޯލްޑް ކަޕަށް ތައްޔާރުވުމުވެ ގޮތުންނެވެ.

އައު ކޯޗެއް ހޯދުމުގެ ތެރެއިން އެމެރިކާ އިން ވަނީ އުމުރުން 57 އަހަރުގެ ކްލޮޕަށް ހުށަހެޅުމެއް ހުށަހަޅައިފަ އެވެ. އެންމެ ފަހުން އިނގިރޭސި ލިވަޕޫލްގެ ކޯޗަކަށް ހުރި ކްލޮޕް ވަނީ އެ ހުށަހެޅުމަށް ފުރަގަސްދީފައި ކަމަށް މީޑިއާ ތަކުން ވަނީ ރިޕޯޓުކޮށްފަ އެވެ. މިއަހަރުގެ ޖަނަވަރީ މަހުގެ ތެރޭގައި ލިވަޕޫލް ދޫކޮށްލަން ނިންމާފައިވާކަން އިއުލާން ކުރުމަށްފަހު، ނިމުނު ސީޒަނާ އެކު ކްލޮޕް ވަނީ އެ ކުލަބުން ވަކިވެފަ އެވެ. އެއަށްފަހު ކްލޮޕް ނިންމީ ދުވަސް ކޮޅަކަށް ކުޑަ ބްރޭކަށް ނެގުމަށެވެ.

މައިންޒުން ކޯޗިން ކެރިއަރު ފެށި ކްލޮޕް ވަނީ ޖަރުމަނުގެ ބޮރޫޝިއާ ޑޯޓްމަންޑު އަދި ލިވަޕޫލަށް ވެސް އިރުޝާދު ދީފަ އެވެ. ލިވަޕޫލާ ހަވާލުވުމަށްފަހު، ކްލޮޕް ވަނީ އެ ކުލަބަށް ގިނަ ކާމިޔާބީތަކެއް ހޯދައިދީފަ އެވެ. އެގޮތުން ކްލޮޕްގެ އިރުޝާދުގެ ދަށުން ލިވަޕޫލުން ވަނީ އަށް ތައްޓެއް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު އަދި ޔުއެފާ ޗެމްޕިއަންސް ލީގު ވެސް ހިމެނެ އެވެ.