މިސަރުކާރުން ކައުންސިލަރުންގެ އަދަދު މަދުކުރުމަށް މަސައްކަތް ކުރަނީ ގްރާންޓްގެ ގޮތުގައި ލިބޭ ފައިސާއަށް އެކްސެސް ނޯންނާތީ: މެންބަރު ނާޒިލް
ލޯކަލް ގަވަނެންސް މިނިސްޓްރީއެއް އުފެއްދީ ހުރިހާ ބާރެއް މިނިސްޓްރީއަށް ނެގުމަށް
ބުރާސްފަތި ދުވަހުގެ ރޭ އެމްޑީޕީން ބޭއްވި ހަރުގެ ޖަލްސާގައި އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވާހަކަދައްކަވަނީ
މިސަރުކާރުން ކައުންސިލަރުންގެ އަދަދު މަދުކުރުމަށް މަސައްކަތް ކުރަނީ ކައުންސިލްތަކަށް ގްރާންޓްގެ ގޮތުގައި ލިބޭ ފައިސާ އެކްސެސް ނޯންނާތީ ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
''ކުރީ ސަރުކާރު ކުރީ ސަރުކާރުގެ'' ނަމުގައި ބުރާސްފަތި ދުވަހުގެ ރޭ ބޭއްވި ޖަލްސާގައި މެންބަރު ނާޒިލް ވިދާޅުވީ ކައުންސިލްތަކަށް ހޮވާ ކައުންސިލަރުންގެ އަދަދު މަދު ކުރުމަށް މިސަރުކާރުން މަސައްކަތް ކުރާ ކަމަށާއި، އެ ހުށަހެޅުން އައިސްފައިވާ ކަމަށެވެ.
މީގެ އިތުރުން މެންބަރު ނާޒިލް ވިދާޅުވީ، ލޯކަލް ގަވަނަންސް އޮތޯރިޓީ (އެލްޖީއޭ) އޮއްވާ ކައުންސިލްތައް ބާރުވެރިކުރުވުން ނަމުގައި ލޯކަލް ގަވަނެންސް މިނިސްޓްރީއެއް އުފެއްދީ ހުރިހާ ބާރެއް މިނިސްޓްރީއަށް ނެގުމަށް ކަމަށެވެ. އަދި މިނިސްޓްރީން ކައުންސިލްތަކަށް ފައިސާ ފޮނުވާ ގޮތަަށް އުސޫލު ބަދަލުކުރަން މަސައްކަތް ކުރާ ކަމަށް އޭނާ ވިދާޅުވިއެވެ.
މެންބަރު ނާޒިލް ވިދާޅުވީ ސަރުކާރުގެ ބޭފުޅުން މަސައްކަތް ކުރަނީ ރައްޔިތުން ބޭނުންވާ ކަންކަން ކޮށްދޭން ނޫން ކަމަށާއި، އެބޭފުޅުން މަސައްކަތް ކުރަނީ އެބޭފުޅުން ބޭނުންވާ ކަންތައްތައް މަގުފަހިވާނެ ގޮތަކަށް މުޅި ނިޒާމު ބައްޓަން ކުރަން ކަމަށެވެ. އަދި އެގޮތަށް ރައްޔިތުން އެއްބަސްނުވުމަށް މެންބަރު ނާޒިލް ގޮވާލެއްވިއެވެ.
މެންބަރު ނާޒިލް ވިދާޅުވީ އެމްޑީޕީގެ ސަރުކާރުގައި ލާމަރުކަޒީ ގާނޫނުގެ ތެރެއިން ބަޖެޓުގެ ވަކި ޕަސެންޓެއް ކަނޑައަޅައި އެ ޕަސެންޓް ކައުންސިލްތަކާ ހަވާލުކުރެވޭނެ ގޮތަށް ގާނޫނު އިސްލާހުކުރީ ރައްޔިތުން ބާރުވެރިކުރުމަށް ކަމަށެވެ. އަބަދުވެސް މަސައްކަތް ކުރަނީ ރައްޔިތުންނާ ގާތުން ޚިދުމަތް ދިނުމަށް ކަމަށެވެ. އެހެންކަމުން މި ނިޒާމު ހަލާކު ކޮށްލުމަށް ފުރުސަތު ނުދިނުމަށް މެންބަރު ނާޒިލް ގޮވާލެއްވިއެވެ.
