މިސަރުކާރުން ކައުންސިލަރުންގެ އަދަދު މަދުކުރުމަށް މަސައްކަތް ކުރަނީ ކައުންސިލްތަކަށް ގްރާންޓްގެ ގޮތުގައި ލިބޭ ފައިސާ އެކްސެސް ނޯންނާތީ ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
''ކުރީ ސަރުކާރު ކުރީ ސަރުކާރުގެ'' ނަމުގައި ބުރާސްފަތި ދުވަހުގެ ރޭ ބޭއްވި ޖަލްސާގައި މެންބަރު ނާޒިލް ވިދާޅުވީ ކައުންސިލްތަކަށް ހޮވާ ކައުންސިލަރުންގެ އަދަދު މަދު ކުރުމަށް މިސަރުކާރުން މަސައްކަތް ކުރާ ކަމަށާއި، އެ ހުށަހެޅުން އައިސްފައިވާ ކަމަށެވެ.
މީގެ އިތުރުން މެންބަރު ނާޒިލް ވިދާޅުވީ، ލޯކަލް ގަވަނަންސް އޮތޯރިޓީ (އެލްޖީއޭ) އޮއްވާ ކައުންސިލްތައް ބާރުވެރިކުރުވުން ނަމުގައި ލޯކަލް ގަވަނެންސް މިނިސްޓްރީއެއް އުފެއްދީ ހުރިހާ ބާރެއް މިނިސްޓްރީއަށް ނެގުމަށް ކަމަށެވެ. އަދި މިނިސްޓްރީން ކައުންސިލްތަކަށް ފައިސާ ފޮނުވާ ގޮތަަށް އުސޫލު ބަދަލުކުރަން މަސައްކަތް ކުރާ ކަމަށް އޭނާ ވިދާޅުވިއެވެ.
އަޅުގަނޑު އިއްޔެ މަޖިލީހުގެ މެންބަރުންނާއެކު ކްރޮސްރޯޑުގައި ބޭއްވި ބައްދަލުވުމެއްގެ ތެރެއިން އަޅުގަނޑަށް ވަރަށް ސާފުވެގެން ދިޔަ މިސަރުކާރުން ކައުންސިލްތައް އޮބަހަައްޓާ ނަގަހައްޓާ ކުޑަކުރަން އުޅެނީ ސައިޒް ކުރަން އުޅެނީ ކީއްވެގެންކަން އަޅުގަނޑަށް ވަރަށް ސާފުވެގެން ދިޔަ. އެބޭފުޅުންގެ ހުށަހެޅުމަކަށް މިއައީ ކައުންސިލްތަކުގެ ސައިޒް ކުޑަކޮށްލާ ވާހަކަ. ކައުންސިލްތަކަށް ގްރާންޓްގެ ގޮތުގައި މިލިބޭ ފައިސާ ސަރުކާރަށް އެކްސެސް ނޯންނާތީ. އެއީ އެބޭފުޅުން ބޭނުންވަނީ ކުޑަކޮށްލަން މި ބޭނުންވާ ގޮތަކީ. މިނިސްޓްރީއެއް ހެއްދެވީ އެހެންވީމަ. މިހާރު ކައުންސިލަށް ލިބިފައި އޮތް ބަޖެޓް ދެން ލިބޭނީ މިނިސްޓްރީއަށޯ. މިނިސްޓްރީން ކޮންމެ މަހަކު ކައުންސިލަށް ބޭނުންވާ ލާރިކޮޅު ފޮނުވަދޭނީ މިނިސްޓަރޯ ފޮނުވާނީ.އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރު ނާޒިލް ވިދާޅުވީ ސަރުކާރުގެ ބޭފުޅުން މަސައްކަތް ކުރަނީ ރައްޔިތުން ބޭނުންވާ ކަންކަން ކޮށްދޭން ނޫން ކަމަށާއި، އެބޭފުޅުން މަސައްކަތް ކުރަނީ އެބޭފުޅުން ބޭނުންވާ ކަންތައްތައް މަގުފަހިވާނެ ގޮތަކަށް މުޅި ނިޒާމު ބައްޓަން ކުރަން ކަމަށެވެ. އަދި އެގޮތަށް ރައްޔިތުން އެއްބަސްނުވުމަށް މެންބަރު ނާޒިލް ގޮވާލެއްވިއެވެ.
މިފައިސާ ކޮޅާ ނުކުޅެވިގެން މިބޭފުޅުން މިކައުންސިލްތައް ކުޑަކުރަން ކައުންސިލްތަކާ ކުޅެން. އެލްޖީއޭ މިތާގައި އޮއްވާ އަނެއްކާ އިތުރު މިނިސްޓްރީއެއް ހަދައިގެން މިކަން ކުރަން މި ބޭނުންފުޅުވާ މަގުސަދަކީ ހަގީގަތުގައި މިފައިސާއާ ނުކުޅެވިގެން. 1.2 ބިލިއަން ރުފިޔާ ކައުންސިލްތަކުގައި އެބަހުރި ސަރުކާރަށް އަތް ނުލެވޭ. ރަނގަޅު ވާހަކަ އެއް. ސަރުކާރު އަތްލާކަށް ނުޖެހޭ ހަގީގަތުގައި. ކީއްކުރަންތޯ ސަރުކާރުން އެއާ ކުޅެންވީ. ރައްޔިތުންނަށް ޚިދުމަތްތަކެއް ދޭން ކައުންސިލްތަކާ ހަވާލުކުރެވިފައި ހުރީ ރައްޔިތުންގެ ފައިސާ އެއީ. އެވަގުތަކު ސަރުކާރަކަށް އައިސްތިބި އެބޭފުޅުން ބޭނުންހާ ގޮތަކަށް ކުޅެން ހުރި ފައިސާތަކެއް ނޫން އެއީ. އެ ފައިސާ ކޮޅާ ނުކުޅެވޭތީ އެކަންތައްތައް މި ބޭފުޅުންނަށް ކަންބޮޑުވަނީ.އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރު ނާޒިލް ވިދާޅުވީ އެމްޑީޕީގެ ސަރުކާރުގައި ލާމަރުކަޒީ ގާނޫނުގެ ތެރެއިން ބަޖެޓުގެ ވަކި ޕަސެންޓެއް ކަނޑައަޅައި އެ ޕަސެންޓް ކައުންސިލްތަކާ ހަވާލުކުރެވޭނެ ގޮތަށް ގާނޫނު އިސްލާހުކުރީ ރައްޔިތުން ބާރުވެރިކުރުމަށް ކަމަށެވެ. އަބަދުވެސް މަސައްކަތް ކުރަނީ ރައްޔިތުންނާ ގާތުން ޚިދުމަތް ދިނުމަށް ކަމަށެވެ. އެހެންކަމުން މި ނިޒާމު ހަލާކު ކޮށްލުމަށް ފުރުސަތު ނުދިނުމަށް މެންބަރު ނާޒިލް ގޮވާލެއްވިއެވެ.
