ޔޫރޯ ފައިނަލަށް ފްރާންސްގެ ރެފްރީއެއް

އާދީއްތަ ދުވަހުގެ ރޭ ސްޕޭނާއި އިންގްލޭންޑް ބައްދަލުކުރާ ޔޫރޯ ފުޓްބޯޅަ މުބާރާތުގެ ފައިނަލް މެޗުގެ ރެފްރީއަކަށް ފްރާންސްގެ ފްރާންކޮއިސް ލެޓެކްސިއާ ހަމަޖައްސައިފި އެވެ.

ޔޫއޭފާއިން މިކަން އިއުލާނުކުރީ ބުރާސްފަތި ދުވަހުގެ މެންދުރު ފަހު އެވެ.

ޖަރުމަނުގެ ބާލިން އޮލިމްޕިކް ސްޓޭޑިއަމުގައި ކުޅޭ ފައިނަލް މެޗު ވެގެންދާނީ ލެޓެކްސިއާ މުބާރާތުގައި ރެފްރީކަން ކުރާނެ ހަތަރު ވަނަ މެޗަށެވެ. މީގެ ކުރިން އޭނާ ވަނީ މި މުބާރާތުގެ ގްރޫޕް ސްޓޭޖުގައި ކްރޮއޭޝިޔާ އާއި އަލްބޭނިއާ ކުޅުނު މެޗާއި ޑެންމާކާއި ސާބިއާ ކުޅުނު މެޗަށް އިންސާފު ކޮށްދިނުމަށްފަހު މުބާރާތުގެ ގަދަ 16ގައި ސްޕޭނާއި ޖޯޖިއާ ކުޅުނު މެޗުގައި ވެސް ރެފްރީކަން ކޮށްފަ އެވެ.

އުމުރުން 35 އަހަރުގެ ލެޓެކްސިއާ އަކީ 2017 ވަނަ އަހަރުން ފެށިގެން ފީފާގެ ރެފްރީއެކެވެ. އޭނާ ފްރާންސްގެ ލީގުގައި ރެފްރީކަން ކުރަން ފެށީ 2016 ވަނަ އަހަރު އެވެ.

އޭނާގެ އެސިސްޓެންޓްގެ ގޮތުގައި ފައިނަލް މެޗުގައި ތިބޭނީ ފްރާންސްގެ ސްރިލް މުގްނިއާ އާއި މެހްދީ ރަމޯނީ އާއި ޕޮލެންޑްގެ ރެފްރީ މާސިނިއާކް އެވެ. މީގެ ތެރެއިން މާސިނިއާކް ހަރަކާތްތެރިވާނީ ބަދަލު ރެފްރީއަކަށެވެ.

ލެޓެކްސިއާ އަކީ 2023 ވަނަ އަހަރު ޔޫއޭފާ ސުޕަކަޕްގައި އިންގްލޭންޑްގެ މެންޗެސްޓާ ސިޓީ އާއި ސްޕޭނުގެ ސެވިއްޔާ ކުޅުނު މެޗުގެ ރެފްރީ ވެސްމެ އެވެ. އަދި އެންމެ ފަހުގެ ޗެމްޕިއަންސް ލީގުގެ ފައިނަލް މެޗުގެ ބަދަލު ރެފްރީ އެވެ.