ގައުމީ ޓީމާއި ލިވަޕޫލާ މެދު ވަރަށް އަވަހަށް ގޮތެއް ނިންމާނަން: ވެންޑައިކް
އޭނާ ބުނީ ނެދަލޭންޑްސް ގައުމީ ޓީމުގައި ކުޅެން ލޯބި ކުރި ނަމަވެސް ބައެއް ކަންކަން ވަރަށް އަވަހަށް ބަދަލުވުން އެކަށީގެންވާ ކަމަށެވެ.
ނެދަލޭންޑްސްގެ ކެޕްޓަން ވެންޑައިކް
ނެދަލޭންޑްސްގެ ގައުމީ ޓީމާއި ލިވަޕޫލްގައި އަދާކުރާނެ ދައުރެއް ވަރަށް އަވަހަށް ނިންމާނެ ކަމަށް ކެޕްޓަން ވާޖިލް ވެންޑައިކް ބުނެފި އެވެ.
އިނގިރޭސިން އަތުން ފަހު ވަގުތު ބަލިވެ، ޔޫރޯ ފުޓްބޯޅަ މުބާރާތުން ކެޓި މެޗަށް ފަހު ނެދަލޭންޑްސްގެ ކެޕްޓަން އިތުބާރު ޑިފެންޑަރު ބުނީ ގައުމީ ޓީމުގެ ކުރިމަގާމެދު ގޮތެއް ނިންމަންޖެހޭ ވަގުތު އަތުވެއްޖެ ކަމަށެވެ. އަދި އޭނާ ކުލަބު ލެވެލްގައި ކުޅޭ ލިވަޕޫލްގައި ހުރުމާމެދު ވެސް ވަރަށް އަވަހަށް ގޮތެއް ނިންމާނެ ކަމަށެވެ. ވެންޑައިކް ލިވަޕޫލާއެކު ހަދާފައިވާ ކޮންޓްރެކްޓްގައި ބާކީ އޮތީ އެއް އަހަރެވެ. ނުވަ ސީޒަނަށް ފަހު ކޯޗުކަމުން ޔާގެން ކްލޮޕް ވަކިވުމާއެކު ވެންޑައިކް ވަނީ އޭނާ ލިވަޕޫލްގައި ހުރުމާމެދު ޔަގީންކަން ދޭން ދެކޮޅު ހަދަމުންނެވެ.
ރޭގެ މެޗާ ބެހޭ ގޮތުން ވެންޑައިކް ބުނީ ފުރަތަމަ ހާފުގައި ރަނގަޅަށް ނުކުޅެވުނު ކަމަށެވެ. ނަމަވެސް ފަހު ހާފުގައި ނެދަލޭންޑްސްގެ މެޗު ކޮންޓްރޯލް ކުރި ކަމަށާއި އުއްމީދުކޮށްގެން ހުރީ ފައިނަލަށް ދާން ކަމަށެވެ.
އޭނާ ބުނީ ނެދަލޭންޑްސް ގައުމީ ޓީމުގައި ކުޅެން ލޯބި ކުރި ނަމަވެސް ބައެއް ކަންކަން ވަރަށް އަވަހަށް ބަދަލުވުން އެކަށީގެންވާ ކަމަށެވެ.
ވެންޑައިކް އަކީ މިވަގުތު ދުނިޔޭގައި ހުރި އެންމެ މޮޅު އެއް ޑިފެންޑަރެވެ. ނަމަވެސް މި ފަހަރުގެ ޔޫރޯގައި އޭނާ އަށް އެކަށީގެންވާ ކުޅުމެއް ނުދެއްކި ފާޑުކިއުންތައް ވަނީ ގިނަވެފަ އެވެ. އޭނާ ހުރީ މިކަމާ ހިތްހަމަނުޖެހިފަ އެވެ.
