ހުކުރު ދުވަހު ބޭއްވި އީރާނުގެ ރިޔާސީ އިންތިޚާބުގެ ދެވަނަ ބުރު ކާމިޔާބު ކުރެއްވުމާއެކު މަސްއޫދު ޕެޒެޝްކިއާން އަކީ އީރާނުގެ އިންތިޚާބީ ރައީސް ކަން އެ ގައުމުގެ އިންތިޚާބާ ބެހޭ އޮފީހުން އިއުލާން ކޮށްފިއެވެ.

އީރާނުގެ ރައީސް އިބްރާހިމް ރައީސީ ދަތުރުފުޅު ކުރެއްވި ހެލިކޮޕްޓަރު ވެއްޓި އެމަނިކުފާނު އަވަހާރަ ވުމާ ގުޅިގެން އެ ގައުމުގައި އިއުލާން ކުރި ކުއްލި ރިޔާސީ އިންތިޚާބުގައި ޖޫން މަހުގެ 28 ގައި ބޭއްވި ފުރަތަމަ ބުރުގައި ވާދަ ކުރި ފަސް ކެންޑިޑޭޓުންގެ ތެރެއިން އެއްވެސް ކެންޑިޑޭޓަކަށް ވޯޓުގެ 50 އިން ސައްތަ ކާމިޔާބު ނުވުމުން، ހުކުރު ދުވަހު ބޭއްވި އިންތިޚާބުގެ ދެވަނަ ބުރުން ޕެޒެޝްކިއާން ކުރި ހޯއްދެވީ، އީރާނުގެ ކުރީގެ ނިއުކްލިއަރ ނިގޯޝިއޭޓަރ ސައީދު ޖަލީލީ އާ ވާދާ ކުރައްވާ 16 މިލިއަނަށް ވުރެ ގިނަ ވޯޓު ހޯއްދަވައިގެންނެވެ.

އިރާނުގެ އިންތިޚާބާ ބެހޭ އޮފީހުން ހާމަ ކޮށްފައިވާ ގޮތުގައި 30 މިލިއަނަށް ވުރެ ގިނަ މީހުން ދެވަނަ ބުރުގައި ވޯޓު ލާފައި ވާއިރު، އިންތިޚާބުގައި ދެވަނަ އަށް ދިޔަ ސައީދު ޖަލީލީއަށް 13 މިލިއަނަށް ވުރެ ގިނަ ވޯޓު ލިބިފައިވެއެވެ.

އިންތިޚާބުގެ ފުރަތަމަ ބުރުންވެސް އެންމެ ގިނަ ވޯޓު ހޯއްދެވީ ޕެޒެޝްކިއާން އެވެ.

އީރާނުގެ އިންތިޚާބާ ބެހޭ އޮފީހުން ބުނެފައިވަނީ ވޯޓު ލުމުގެ ހައްގު ލިބިފައިވާ މީހުންގެ ގާތްގަނޑަކަށް 50 އިން ސައްތަ މީހުން ވޯޓު ލީ ކަމަށެވެ.

ޕެޒެޝްކިއާން އަކީ ހިތުގެ އޮޕަރޭޝަން ޑޮކްޓަރެކެވެ. އޭނާ ވަނީ އީރާނުގެ ސިއްހަތާ ބެހޭ ވަޒީރުގެ ނައިބު ކަމާއި، އަދި ފަހުން ސިއްހަތާ ބެހޭ ވަޒީރު ކަން ވެސް ކުރައްވާފައެވެ.

ޕެޒެޝްކިއާން ވަނީ ގާނޫނު ހަދާ މަޖިލީހުގެ މެމްބަރު ކަމާއި، ގާނޫނު ހަދާ މަޖިލީހުގެ ނައިބު ރައީސް ކަން ވެސް ކުރައްވާފައެވެ.