ހަމައެކަނި ރިސޯޓް މުވައްޒަފުންނަށް ކުޅެވޭ މޯލްޑިވްސް ރިސޯޓް ވޮލީ ބޯޅަ ލީގު ހުކުރު ދުވަހު ފަށައިފި އެވެ.

ދެ ޒޯނެއްގައި ކުރިއަށް ގެންދާ މުބާރާތުގައި ވާދަކުރަނީ ނުވަ ރިސޯރޓަކުންނެވެ. އެއީ މާލެ ޒޯނުން ހަތަރު ރިސޯޓާއި, ބ.ޒޯނުން ފަސް ރިސޯޓެވެ. ހުކުރު ދުވަހު މުބާރާތް ފެށީ މާލެ ޒޯންގަ އެވެ.

މާލެ ޒޯންގައި ކުޅުނު ފުރަތަމަ މެޗު ކާމިޔާބުކުރީ ފޯސީޒަން ރިސޯޓްސް އެޓް ކުޑަ ހުރާ އެވެ. އެ ރިސޯރޓްގެ ޓީމް މެޗު ކާމިޔާބު ކުރީ ހޮލިޑޭ އިން ރިސޯރޓް ކަނޑޫމާ މޯލްޑިވްސްއާ ވާދަކޮށް ސީދާ ތިން ސެޓުންނެވެ. މެޗުގެ ސެޓްތައް ކުޑަހުރާ އިން ގެންދިޔައީ 25-18, 25-16 އަދި 25-16ން ނެވެ. މެޗުގެ މޮޅު ކުޅުންތެރިއަކީ ކުޑަހުރާގެ އަބްދުالله ހަސަން އެވެ.

މާލެ ޒޯންގެ މެޗުތައް ހޮސްޓް ކުރަނީ ކުޑަހުރާއިންނެވެ. އެކަމަކު އެރިސޯޓުން މެޗުތައް ކުޅެނީ ޖެހިގެން އޮތް މާލެ އަތޮޅު ހުރާގަ އެވެ. މިއީ ރިސޯރޓް ވޮލީ މުބާރާތެއްގެ މެޗެއް މީހުން ދިރިއުޅޭ ރަށެއްގައި ކުޅޭ ފުރަތަމަ ފަހަރެވެ.

މުބާރާތް ކުރިއަށް ގެންދާ ވޮލީބޯލް އެކަޑަމީ މޯލްޑިވްސް އިން ބުނީ މާލެ ޒޯންގައި ނުވަ ޓީމުން ބައިވެރިވި ނަމަވެސް އެކި ސަބަބުތަކާހުރެ ބައެއް ޓީމްތަކުން ފަހުވަގުތު ވަކިވި ކަމަށެވެ. އޭގެތެރޭގައި ގަވާއިދު ތަން ނުދޭ ބައެއް ކަންކަން ހުރުންވެސް ހިމެނޭ ކަމަށް ބުންޏެވެ.