ޖާމަނީއަށް އިސްވެ ހަމަލާދޭނީ ސްޕޭން: ކޯޗު

ޔޫރޯ ފުޓްބޯޅަ މުބާރާތުގައި މިރޭ ސްޕޭނާއި ޖާމަނީ ބައްދަލުކުރާ މެޗުގައި އިސްވެ ހަމަލާއަށް އަރާނީ ސްޕޭން ކަމަށް ކޯޗު ޑެލަފުއެންޓޭ ބުނެފި އެވެ.

މުބާރާތުގައި އޮތް އެންމެ ގަދަ ދެ ޓީމު ކަމަށް ގިނަ ބަޔަކު އެއްބަސްވާ ދެ ޓީމުގެ ކުރިމަތިލުމުގައި ޖާމަނީ ހުއްޓުވެނީ ޑެލަފުއެންޓޭގެ ނަޒަރުގައި ހުއްޓުމެއްނެތި އެޓޭކްކޮށްގެންނެވެ.

އޭނާ ބުނީ މި މެޗަކީ މުބާރާތުގެ ފައިނަލް ކަމަށް ގިނަ ބަޔަކު ބުނަމުންދިއުމަކީ ދެ ޓީމުގެ ފެންވަރަށް ބަލާފައި ބުނާ ބުނުމެއް ކަމަށާއި އޭނާ އަށް ވެސް މެޗަކީ ފައިނަލެއް ކަމަށެވެ. އަދި މެޗުން މޮޅުވާން އެންމެ މުހިއްމު އެއް ކަމަކީ ޖާމަނީގެ ޓޯނީ ކްރޫސް ބޯޅަ ލިބުނަ ނުދިނުން ކަމަށެވެ.

ޖާމަނީ އާއި ސްޕޭނަކީ މުބާރާތުގެ އެންމެ ކާމިޔާބު ދެ ޓީމެވެ. ކޮންމެ ބަޔަކު ވެސް ވަނީ މިހާތަނަށް ތިން ފަހަރު މުބާރާތް ކާމިޔާބުކޮށްފަ އެވެ. މި މެޗުން މޮޅުވާ ޓީމެއް ސެމީ ފައިނަލުގައި ވާދަކުރާނީ ފްރާންސާއި ޕޯޗުގަލް ކުޅޭ މެޗުން މޮޅުވާ ޓީމަކާ އެވެ.