ހިޒްބުﷲ އިން ދިން ރޮކެޓް ހަމަލާއެއްގައި އިޒްރޭލްގެ 18 ސިފައިން ޒަޚަމް ވެއްޖެ ކަމަށް އެ ގައުމުގެ އަސްކަރިއްޔާ އިން އާދިއްތަ ދުވަހު އެކްސް ގައި ހާމަކުރި ބަޔާނެއްގައި ބުނެފިއެވެ.
އެތައް ބަޔަކު ޒަޚަމްވި މި ހާދިސާ ހިނގި ގޮތް ކަމަށް އިޒްރޭލުން ބުނެފައިވަނީ ދެކުނު ލުބުނާނުން އުދުއްސާލި ޑްރޯނެއް ގޯލާން ހައިޓްސް އަށް އައިސް ގޮވުމުގެ ސަބަބުން ކަމަށެވެ.
ހިޒްބުﷲ އިން ވެސް ވަނީ މި ހަމަލާ ދިން ކަމަށް ބުނެ ބަޔާނެއް ނެރެފައެވެ.
އާދިއްތަ ދުވަހު އިޒްރޭލުން ދިން ހަމަލާއެއްގައި ލެބަނަންގެ ހައުލާ އަވަށުގައި ހުރި 2 ބުރި އިމާރާތެއް ހަލާކުވެ ހިޒްބުﷲ ގެ 4 ހަނގުރާމަވެރިން މަރުވެފައިވާ ކަމަށް އެ ޖަމާއަތުން ބުނެފައިވެއެވެ.
އަނެއް ކޮޅުން އިޒްރޭލުގެ ފައިޓަރ ޖެޓް ތަކުން ދެކުނު ލުބުނާނުގެ ހިޒްބުﷲ ގެ މަގާމު ތަކަށް ހަމަލާ ދިން ކަމަށް އިޒްރޭލުން ބުނެފައިވެއެވެ.
ހުސްވި އަހަރުގެ އޮކްޓޯބަރު މަހުން ފެށިގެން އިޒްރޭލާ ހިޒްބުﷲ އާ ދެމެދު އަންނަނީ ހަމާލާތައް ބަދަލު ކުރެވެމުންނެވެ.
މުޅި ދުނިޔެ ކަންބޮޑުވެފައި މިހާރު ވަނީ އިޒްރޭލާ ހިޒްބުﷲ އާ ދެމެދު ފުރިހަމަ ހަނގުރާމައެއް ފެށިދާނެ ކަމަށެވެ.
