ފަހަތުން އަރައި ޖޯޖިއާ ބަލިކޮށް، ސްޕެއިން ކުއާޓާ ފައިނަލަށް

ޔޫރޯ ފުޓުބޯޅަ މުބާރާތުގެ ގަދަ 16 ވަނަ ބުރުގައި ޖޯޖިއާއާ ދެކޮޅަށް ކުޅުނު މެޗުން މޮޅުވެ، ސްޕެއިން އިން މުބާރާތުގެ ކުއާޓާ ފައިނަލްގެ ޖާގަ ހޯދައިފި އެވެ.

އާދިއްތަ ދުވަހުގެ ރޭ ދަންވަރު ޖޯޖިއާއާ ދެކޮޅަށް ކުޅުނު މެޗު ސްޕެއިން އިން ކާމިޔާބު ކުރީ، ފަހަތުން އަރައި މޮޅުވެގެންނެވެ. އެއީ މެޗުގައި ޖޯޖިއާ އިން ލަނޑު ޖަހައި ލީޑު ހޯދާފައި ވަނިކޮށެވެ. ޖޯޖިއާގެ މައްޗަށް ސްޕެއިން އިން ކުރި ހޯދީ 4-1 އިންނެވެ.

ސްޕެއިން އަކީ މިއަހަރުގެ ޔޫރޯ މުބާރާތުގައި އެންމެ ރަނގަޅު ނަތީޖާއެއް ނެރެފައިވާ އެއް ޓީމެވެ. މުބާރާތުގެ ގަދަ 16 ވަނަ ބުރުން ސްޕެއިން ޖާގަ ހޯދީ، ގްރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެގެންނެވެ.

މެޗު ފަށައިގެން 18 ވަނަ މިނެޓުގައި ޖޯޖިއާ އަށް ވަނީ ލީޑު ލިބިފަ އެވެ. އެއީ ޖޯޖިއާގެ ކުޅުންތެރިޔަކު ހުރަސްކޮށްދިން ބޯޅަ އަކަށް ކުޅެން އުޅުމުގެ ތެރޭގައި ސްޕެއިންގެ ޑިފެންޑަރު ރޮބިން ލީ ނޯމަންޑުގެ ކޮނޑުގައި ޖެހި ބޯޅަ ގޯލަށް ވަދެގެންނެވެ.

މެޗު ފަށައިގެން ވެސް ރަނގަޅަށް ކުޅެމުން އައި ސްޕެއިން އިން ވަނީ ފުރަތަމަ ހާފު ނިމުމުގެ ކުރިން ލަނޑު ޖަހައި ނަތީޖާ ހަމަހަމަ ކޮށްފަ އެވެ. ފުރަތަމަ ހާފުގެ 39 ވަނަ މިނެޓުގައި ސްޕެއިން އަށް ނަތީޖާ ހަމަހަމަ ކޮށްދިން ލަނޑު ޖެހީ ރޮޑްރީ އެވެ. އެއީ ނިކޯ ވިލިއަމްސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ދެ ވަނަ ހާފު ފަށައިގެން ކުރީ ކޮޅު ސްޕެއިން އިން ވަނީ ދެ ވަނަ ލަނޑެއް ޖަހައި މެޗުގެ ލީޑު ހޯދައިފަ އެވެ. ދެ ވަނަ ހާފު ފަށައިގެން ހަ ވަނަ މިނެޓުގައި ސްޕެއިން އަށް ލީޑު ނަގައިދިނީ ފަބިއަން ރުއީޒް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ލަމީން ޔަމާލް އެވެ.

އޭގެ ފަހުން މެޗުގެ 73 ވަނަ މިނެޓުގައި ސްޕެއިންގެ ޒުވާން ކުޅުންތެރިޔާ ޔަމާލް، އެ ޔަމާލް އެ ޓީމުގެ ތިން ވަނަ ލަނޑެއް ޖެހި ނަަމަވެސް އޮފްސައިޑުގައި ހުރުމުން ވަނީ އެ ލަނޑު ބަަލައި ނުގަންނަން ނިންމައިފަ އެވެ.

އޭގެ އިރުކޮޅެއް ފަހުން ސްޕެއިންގެ ތިން ވަނަ ލަނޑު ޖެހީ ވިލިއަމްސް އެވެ. ޖޯޖިއާގެ އޭރިޔާ ބެރުން ލިބުނު ބޯޅަ ހިފައިގެން އޭރިޔާ ތެރެއަަށް ވަދެ، ގޯލުގެ މަތީ ދާގަނޑަށް ބޯޅަ ފޮނުވާލައިގެން ވިލިއަމްސް އެ ލަނޑު ޖެހީ 75 ވަނަ މިނެޓުގަ އެވެ. މެޗުގެ

މެޗުގެ 83 ވަނަ މިނެޓުގައި ސްޕެއިންގެ ހަތަރު ވަނަ ލަނޑު ޖެހީ ޑެނީ އޮލްމޯ އެވެ. އެއީ ޖޯޖިއާގެ އޭރިޔާ ބޭރުން ލިބުނު ބޯޅަ ހިފައިގެން، އޭރިޔާގެ ރޮނގު ކައިރީ ހުރެ ތިރި ތިރިން ގޯލަށް ފޮނުވާލައިގެން އޭނާ ޖެހި ލަނޑެކެވެ. އޮލްމޯ ފޮނުވާލި ބޯޅަ ހުއްޓުވުމަށް ޖޯޖިއާގެ ގޯލު ކީޕަރަށް މާބޮޑު މަސައްކަތެއް ވެސް ނުކުރެވުނެވެ.

މުބާރާތުގެ ކުއާޓާ ފައިނަލްގައި ސްޕެއިން ނިކުންނަން ޖެހޭނީ، މުބާރާތް ބާއްވާ ޤައުމު ޖަރުމަނާ ދެކޮޅަށެވެ.