ފުލުހުންގެ ސްޓްރެޓެޖިކް ޕްލޭންގައި ގޭންގް ކުށްތައް މަދު ކުރުމަށް މަސައްކަތްތަކެއް ހިމެނިފައިވާނެ: ފުލުހުން
ޒަމާނީ ފުލުހުންގެ މުއައްސަސާއެއް ޤާއިމު ކުރުމަށް ޑިޖިޓަލް ކޮމާންޑެއް އެކުލަވާލެވިފައިވޭ
ފުލުހުންގެ މައި އިދާރާ
ދިވެހި ފުލުހުންގެ ޚިދުމަތުގެ ކުރިއަށް އޮތް 4 އަހަރު ދުވަހުގެ ސްޓްރެޓެޖިކް ޕްލޭން ތަންފީޒު ކުރުމަށް ޚިދުމަތުގެ ނިޒާމު ސްޓްރަކްޗަރ ކޮށް އަންނަ ބަދަލުތައް ފުލުހުން ހިއްސާކޮށްފިއެވެ.
ދިވެހި ފުލުހުންގެ ޚިދުމަތުން ބުނީ، ފުލުހުންގެ ކުރިއަށް އޮތް 4 އަހަރު ދުވަހުގެ ސްޓްރެޓެޖިކް ޕްލޭން ތަންފީޒު ކުރުމަށް ޚިދުމަތުގެ ނިޒާމު ސްޓްރަކްޗަރ ކޮށް، ޖުލައި 1ން ފެށިގެން ބަދަލުތަކެއް ހިމެނިފައިވާނެ ކަމަށެވެ. އެ ބަދަލުތައް ފުލުހުން ވަނީ ހިއްސާކޮށްފައެވެ.
ދިވެހި ފުލުހުންގެ ޚިދުމަތުން މައުލޫމާތު ދޭ ގޮތުގައި އެ ބަދަލުތަކުގެ މައިގަނޑު ބޭނުމަކީ ފުލުހުންގެ ސްޓްރެޓެޖިކް ޕްލޭން ތަންފީޒު ކުރުމަށް މަސައްކަތްތައް ތަރުތީބު ކުރުމެވެ. އެގޮތުން ލޯކަލް ޕޮލިސިންގ ސަރަޙައްދުތައް ހިމަނައިގެން 17 ކޮމާންޑް އެންޑް ޑައިރެކްޓްރޭޓުގެ މައްޗަށް ފުލުހުންގެ ޚިދުމަތް ވަނީ ބައްޓަން ކުރެވިފައެވެ.
އަދި އިލްމާއި ތަމްރީނާ ގުޅޭގޮތުން ކޮމާންޑް އެންޑް ޑައިރެކްޓްރޭޓް އަދި ޑިޕާޓްމަންޓުތަކުގެ ވެރިން އައްޔަނު ކުރެވިފައިވާނެކަމަށްވެސް ފުލުހުން މައުލޫމާތު ދެއެވެ.
އޭގެ އިތުރުން، ގޭންގް ކްރައިމް އެންފޯސްމަންޓް، ޑިޖިޓަލް ޑާޓާ އެންޑް ޓެކްނޮލޮޖީ އަދި ހުޅުމާލޭގެ މަސައްކަތްތައް އިތުރަށް ހަރުދަނާ ކުރުމަށް ހުޅުމާލޭގެ ވަކި ޕޮލިސިންގ ކޮމާންޑެއް އަލަށް ޤާއިމު ކުރެވިފައިވާކަންވެސް ފުލުހުން ފާހަގަ ކުރެއެވެ.
ފުލުހުންގެ ޚިދުމަތުން މައުލޫމާތު ދޭ ގޮތުގައި ގޭންގް ކުށްތައް މަދު ކުރުމަށް މަސައްކަތްތަކެއް ކުރުމަކީވެސް މުހިއްމު މަޤްސަދެކެވެ.
އޭގެ އިތުރުން، ޒަމާނީ ފުލުހުންގެ މުއައްސަސާއެއް ޤާއިމު ކުރުމަށް ޑިޖިޓަލް ކޮމާންޑެއް އެކުލަވާލެވިފައިވާކަންވެސް ފާހަގަކޮށްފައިވެއެވެ.
ހަމައެއާއެކު، ފުލުހުންގެ ގަވަނަންސް ނިޒާމު ހަރުދަނާކޮށް، ޒަމާނާ އެއްގޮތަށް ފުލުހުންގެ ޚިދުމަތްތައް ބައްޓަން ކުރުންވެސް މި ބަދަލުތަކުގެ މަޤްސަދުތަކުގެ ގޮތުގައި ހިމެނިފައިވެއެވެ. އަދި އިތުބާރު ހިފޭ، އަވަސް ޚިދުމަތުގެ ނިޒާމެއް އެކަށައެޅުންވެސް މި 4 އަހަރުގެ ޕްލޭން ގެ ތެރޭގައި ހިިމެނިފައިވެއެވެ.
