ޗިލީއާ އެއްވަރުކޮށް، ކެނެޑާ ކުއާޓާ ފައިނަލަށް
މެޗު އެއްވަރުވެ ލިބުނު އެއް ޕޮއިންޓާއެކު، ކެނެޑާ އިން ވަނީ ގްރޫޕް އޭގެ ދެ ވަނަ ހޯދައިފަ އެވެ.
ކެނެޑާ އާއި ޗިލީ ކުޅުނު މެޗުގެ ތެރެެއިން
ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގެ ގްރޫޕް ސްޓޭޖުގެ ފަހު މެޗުގައި ޗިލީއާ އެއްވަރުކޮށް، ކެނެޑާ އިން މުބާރާތުގެ ކުއާޓާ ފައިނަލަށް ދަތުރު ކޮށްފި އެވެ.
ގްރޫޕް ސްޓޭޖުގެ ފަހު މެޗަށް ކެނެޑާ ނިކުތްއިރު އެ ޓީމު ވަނީ ކުރިން ކުޅުނު އެއް މެޗުން ބަލިވެ، އަނެއް މެޗުން މޮޅުވެފަ އެވެ. ޗިލީ ކުޅުނު ފުރަތަމަ މެޗު އެއްވަރުވެފައިވާއިރު، ދެ ވަނަ މެޗުން ވަނީ ބަލިވެފަ އެވެ.
އެހެންކަމުން ޗިލީ އަށް މުބާރާތުގެ ކުއާޓާ ފައިނަލްގެ ފުރުސަތު ލިބެން އޮތީ ކެނެޑާގެ މައްޗަށް ކުރި ހޯދައިގެންނެވެ. ޗިލީއާ ދެކޮޅަށް ކެނެޑާ އިން ކުޅުނު މެޗުން ބަަލި ނުވެ ފަރުޖައްސާލައިގެން އެ ޓީމަށް ކުއާޓާ ފައިނަލްގެ ފުރުސަތު އޮތްއިރު، މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
މެޗުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތުތަކެއް ލިބިފަ އެވެ. މެޗު ފަށައިގެން ކުރީ ކޮޅު ކެނެޑާގެ ޑިފެންޑަރު އަލިސްޓެއާ ޖޯންސްޓަން ބޮލުން ފޮނުވާލި ބޯޅަ، ޗިލީގެ ގޯލު ކީޕަރު ގަބްރިއަލް އަރިއާސް ވަނީ މަތަކޮށްފަ އެވެ. އޭގެ ފަހުން ޗިލީގެ ވިކްޓޯ ޑެވިލާ ފޮނުވާލި ބޯޅަ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
އޭގެ ފަހުން ކެނެޑާގެ ޖޮނަތަން ޑޭވިޑް، ޗިލީގެ އޭރިޔާ ކައިރިން އެ ޓީމުގެ ގޯލު ކީޕަރު ކައިރިން ނައްޓައި ފޮނުވާލި ބޯޅަ ދިޔައީ ގޯލު ކައިރިން ބޭރަށެވެ. އެ ވަގުތު ޗިލީގެ ކީޕަރު ކެނެޑާގެ ޖޮނަތަން އަށް ފައުލް ކުރި ކަމަށް ބުނެ، އެ ޓީމު ކުޅުންތެރިން ވަނީ ޕެނަލްޓީ އަކަށް އެޕީލް ކޮށްފަ އެވެ. އޭގެ ފަހުން ޗިލީގެ އެލެކްސިސް ސަންޗޭޒް ފޮނުވާލި ބޯޅަ ކެނެޑާގެ ކީޕަރު ވަނީ މަތަކޮށްފަ އެވެ.
މެޗު އެއްވަރުވެ ލިބުނު އެއް ޕޮއިންޓާއެކު، ކެނެޑާ އިން ވަނީ ގްރޫޕް އޭގެ ދެ ވަނަ ހޯދައިފަ އެވެ. އެއީ ތިން މެޗުން ހަތަރު ޕޮއިންޓު ހޯދައިގެންނެވެ. ކެނެޑާއާ އެއްވަރުވެ ޗިލީ އަށް ލިބުނީ ގްރޫޕްގެ ތިން ވަނަ އެވެ. އެއީ ތިން މެޗުން ދެ ޕޮއިންޓު ހޯދައިގެންނެވެ.
