މެކްސިކޯ ބަލިކޮށް، ވެނެޒުއެލާ އެއް ވަނަ އަށް
27 ޖޫން 2024 | ބުރާސްފަތި 06:40ވެނެޒުއެލާ ގްރޫޕް ބީގެ އެއް ވަނައިގައި އޮތީ މިހާތަނަށް ކުޅުނު ދެ މެޗުން ވެސް މޮޅުވެ ހަ ޕޮއިންޓު ހޯދައިގެންނެވެ.
ވެނެޒުއެލާ އާއި މެކްސިކޯ ކުޅުނު މެޗުގެ ތެރެއިން
ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގައި މެކްސިކޯއާ ދެކޮޅަށް ކުޅުނު މެޗުން ވެނެޒުއެލާ މޮޅުވެއްޖެ އެވެ.
ގްރޫޕް ބީގައި ބުދަ ދުވަހުގެ ރޭ މި ދެ ޓީމު ބައްދަލުކުރިއިރު، ދެ ޓީމު ވެސް ވަނީ ކުޅުނު ފުރަތަމަ މެޗުން މޮޅުވެފަ އެވެ. މެކްސިކޯއާ ދެކޮޅަށް ކުޅުނު މެޗު ވެނެޒުއެލާ އިން ކާމިޔާބު ކުރީ 1-0 އިންނެވެ.
މެޗުގައި ވެނެޒުއެލާ އިން ލަނޑު ޖެހީ ދެ ވަނަ ހާފުގައި ލިބުނު ޕެނަލްޓީ އަކުންނެވެ. މެޗުގެ 57 ވަނަ މިނެޓުގައި ލިބުނު ޕެނަލްޓީ ކާމިޔާބުކޮށް، ވެނެޒުއެލާ އަށް ކުރި ހޯދައިދިނީ ސްލޮމޮން ރޮންޑޮން އެވެ. މެޗުގައި މެކްސިކޯ އާއި ވެނެޒުއެލާގެ ކުޅުންތެރިންނާ ދެމެދު ކޮންމެ ވެސް ވަރެއްގެ ހަަމަ ނުޖެހުމެއް ވެސް ހިނގި އެވެ.
މެޗުގެ ނަތީޖާ ހަމަހަމަ ކުރުމަށް މެކްސިކޯ އަށް ފުރުސަތު ލިބުނެވެ. މެޗުގެ ފަހު ވަގުތު އެ ޓީމަށް ޕެނަލްޓީއެއް ލިބުނީ ވެނެޒުއެލާ ކުޅުންތެރިޔެއްގެ އަތުގައި ބޯޅަ ޖެހުމުންނެވެ. އެއީ ވީޑިއޯ އެސިސްޓެންޓް ރެފްރީ (ވީއޭއާރު) ބެލުމށްފަހު ރެފްރީ ދިން ޕެނަލްޓީ އެވެ. މެކްސިކޯގެ އޯބެލިން ޕިނެޑާ ފޮނުވާލި ބޯޅަ ވެނެޒުއެލާގެ ގޯލު ކީޕަރު ވަނީ މަތަކޮށްފަ އެވެ.
ނަތީޖާ އާއެކު ވެނެޒުއެލާ ގްރޫޕް ބީގެ އެއް ވަނައިގައި އޮތީ މިހާތަނަށް ކުޅުނު ދެ މެޗުން ވެސް މޮޅުވެ ހަ ޕޮއިންޓު ހޯދައިގެންނެވެ. ގްރޫޕް ސްޓޭޖުގެ ފަހު މެޗުގައި އެ ޓީމު ނިކުންނާނީ ޖެމެއިކާއާ ދެކޮޅަށެވެ. މެކްސިކޯ އޮތީ މިހާތަނަށް ކުޅުނު ދެ މެޗުން ތިން ޕޮއިންޓާއެކު ތިން ވަނައިގަ އެވެ.
