ހުޅަނގުގެ ގައުމުތަކުން ލުބުނާނަށް ހަމަލާ ދޭން އިޒްރޭލަށް ހިތްވަރު ދޭ ކަމަށް ތުރުކީގެ ރައީސް ތައްޔިބް އުރުދުޣާން ތުހުމަތު ކުރައްވައިފިއެވެ.
އުރުދުޣާން ބުދަދުވަހު ވިދާޅުވީ، ލުބުނާނަށް ހަމަލާ ދިނުމަކީ އިޒްރޭލުގެ ރޭވުމެއްގެ ދަށުން މުޅި ސަރަހައްދަށް ހަނގުރާމަ ފެތުރުމަށް ކުރާ ކަމެއް ކަމަށެވެ.
އުރުދުޣާންގެ ޕާޓީ އޭކޭޕީ އަށް ނިސްބަތްވާ ތުރުކީގެ ގާނޫނު ހަދާ މަޖިލީހުގެ މެމްބަރުންނާ ބައްދަލު ކުރައްވާ އޭނާ ވިދާޅުވީ، އިޒްރޭލުގެ ނަޒަރު މިހާރު ހުރީ ލުބުނާނާ ދިމާލަށް ކަމަށާއި، އެ ކަމުގައި ހުޅަނގުގެ ގައުމުތަކުން އިޒްރޭލަށް ހިތްވަރު ދީ ކޮނޑުގައި އަޅާ ކޮށްޕަމުން ދާކަމަށެވެ.
"އިޒްރޭލުގެ ބޮޑުވަޒީރުގެ ރޭވުމުގެ ދަށުން މުޅި ސަރަހައްދަށް ހަނގުރާމަ ފެތުރުމުން އެކަމުގެ ނަތީޖާ އަކަށް ވާނީ މިހާރަށް ވުރެ މުސީބާތަކާ ކުރިމަތިލާން ޖެހުން." އުރުދުޣާން ވިދާޅުވިއެވެ.
"މިނިވަންކަމަށާއި، އިންސާނީ ހައްގުތަކަށާއި، އަދުލު އިންސާފު ކުރިއެރުވުމަށް ވާހަކަ ދައްކާ ގައުމުތަކުން ސިކުނޑި ހަމަ ނުޖެހޭ މީހެއްގެ އަތްދަށުވެފައި ތިބުމަކީ ވަރަށް ހިތާމަ ހުރި ކަމެއް." އިޒްރޭލުގެ ބޮޑު ވަޒީރު ނަތަންޔާހޫ އަށް އަމާޒު ކުރައްވާ އުރުދުޣާން ވިދާޅުވިއެވެ.
އުރުދުޣާން މި މޭރުމުން ވާހަކަފުޅު ދެއްކެވީ، އިޒްރޭލާއި ލުބްނާންގެ ހިޒްބުﷲ ޖަމާއަތާ ދެމެދު ބަދަލު ކުރެވޭ ހަމަލާތައް އިތުރުވެ މަސްރަހް ވަރަށް ބޮޑަށް ހޫނުވެ، ފުރިހަމަ ހަނގުރާމައަކަށް ބަދަލުވެގެން ހިނގައިދާނެ ކަމުގެ ކަންބޮޑުވުން މުޅި ދުނިޔޭގައި އުފެދިފައިވާ ދަނޑިވަޅެއްގައެވެ.
