ހިޒްބުﷲ ގެ އިންޒާރަށް ސައިޕްރަސްގެ ރައީސްގެ ރައްދު – މިއީ ހަނގުރާމައިގެ ބައިވެރިއެއް ނޫން
ސައިޕްރަސްގެ ރައީސްގެ ބަޔާނުގައި ބުނެފައިވަނީ ސައިޕްރަސް އަކީ މައްސަލައިގެ ބައެއް އެއް ނޫން ކަމަށާއި އެއީ ހައްލުގެ ބައެއް ކަމަށް.
ސައިޕްރަސްގެ ރައީސް ނިކޮސް ކްރިސްތޯޑޫލީދިސް
ސައިޕްރަސް އަކީ މެދު އިރުމަތީގައި ހިނގާ ހަނގުރާމައިގެ ބައިވެރއެއް ނޫން ކަމަށް ސައިޕްރަސްގެ ރައީސް ނިކޮސް ކްރިސްތޯޑޫލީދިސް ވިދާޅުވެ ހިޒްބުﷲ އިން ސައިޕްރަސް އަށް ދިން އިޒްރާރަށް ރައްދު ދެއްވައިފިއެވެ.
"އަޅުގަނޑު އެ ވާހަކަތައް ކިޔައިފިން. އަޅުގަނޑުގެ ޖަވާބަކީ ރިޕަބްލިކް އޮފް ސައިޕްރަސް އިން ހަނގުރާމައިގައި އެއްވެސް ގޮތަކުން ބައިވެރިއެއް ނުވެޔޭ." ހިޒްބުﷲ ގެ ވެރިޔާ ހަސަން ނަސްރުﷲ ބުދަ ދުވަހު ޓީވީ މެދުވެރިކޮށް ދިން ބަޔާނުގައި ސައިޕްރަސް އަށް އަމާޒު ކޮށް ދެއްކި ވާހަކަ އަށް ރައްދު ދީ ސައިޕްރަސްގެ ރައީސް އޮފީހުގެ ވެބްސައިޓްގައ ޝާއިއު ކޮށްފައިވާ ބަޔާނެއްގައި ވެއެވެ.
ބުދަ ދުވަހު ނަސްރުﷲ ދިން ބަޔާނުގައި ބުނެފައިވަނީ އިޒްރޭލުން ލުބުނާނަށް ހަމަލާ ދިނުމަށް ސައިޕްރަސް އިން އެހީތެރި ވެއްޖެ ނަމަ އެ ޖަމާއަތުން ދެކޭނީ ސައިޕްރަސް އަކީ ހަނގުރާމައިގެ ބައިވެރިއެއްގެ ގޮތުގައި ކަމަށެވެ.
ސައިޕްރަސްގެ ރައީސްގެ ބަޔާނުގައި "ސައިޕްރަސް އަކީ މައްސަލައިގެ ބައެއް އެއް ނޫން... އެއީ ހައްލުގެ ބައެއް." ކަން ފާހަގަ ކޮށްފައިވެއެވެ.
އިޒްރޭލުން ގާޒާ އަށް ދެމުންދާ ހަމަލާތަކުގައި، އެހީ ގެންދެވޭނެ އެއްގަމު މަގުތައް އިޒްރޭލުން ބަންދު ކުރުމުން، ގާޒާ އަށް ކަނޑުގެ މަގުން އެހީ ފޯރުކޮށް ދެވޭ ގޮތް ވީ އެކަމަށް ސައިޕްރައިސް އިން މަގު ހުޅާލުމުން ކަން ސައިޕްރަސްގެ ރައީސްގެ ބަޔާނުގައި ފާހަގަ ކުރެއްވިއެވެ.
"އިންސާނިއްޔަވަންތަ ކަމުގެ ގޮތުން ސައިޕްރަސް އިން އަދާ ކުރި މި ރޯލު ބައިލައިގަންނަނީ ހަމަ އެކަނި އަރަބި ގައުމު ތަކުންނެއް ނޫން، މުޅި ދުނިޔެ ވެސް ބަލައިގަނޭ." ބަޔާނުގައި ވެއެވެ.
"އެހެން ކަމުން ސައިޕްރަސް އިން ހަނގުރާމައިގައި އެއްވެސް ގޮތެއް ގައި ބައިވެރި އެއް ނުވޭ." ސައިޕްރަސްގެ ރައީސް ވިދާޅުވެފައިވެއެވެ.
ސައިޕްރަސް އިން އެގައުމުގެ ވައިގެ ބަނދަރެއް ނުވަތަ އަސްކަރީ ބޭސް އެއް އިޒްރޭލުގެ ބޭނުމަށް ދޫކުރިކަން މިހާތަނަށް އެނގެން ނެތް ކަމަށްވެސް ރިޕޯޓުތައް ބުނެއެވެ.
