ހަންގޭރީ ބަލިކޮށް، ޖަރުމަނު ގަދަ 16 ވަނަ ބުރަށް

ޔޫރޯ ފުޓުބޯޅަ މުބާރާތުގެ ގްރޫޕް ސްޓޭޖުގެ ދެ ވަނަ މެޗުގައި ހަންގޭރީ އަތުން މޮޅުވެ، މުބާރާތް ބާއްވާ ޤައުމު ޖަރުމަނުން ގަދަ 16 ވަނަ ބުރުގެ ޖާގަ ޔަގީން ކޮށްފި އެވެ.

ގްރޫޕް އޭ ގައި ބުދަ ދުވަހުގެ ރޭ ހަންގޭރީއާ ދެކޮޅަށް ނިކުތްއިރު ޖަރުމަނު ވަނީ ކުޅުނު ފުރަތަމަ މެޗުން މޮޅުވެފަ އެވެ. ފުރަތަމަ މެޗުން ހަންގޭރީ ބަލިވެފައިވާއިރު، އެ ޓީމަށް އޮތީ މޮޅުވާން މަޖުބޫރު ވެސް ވެފަ އެވެ.

ހަންގޭރީއާ ދެކޮޅަށް ޖަރުމަނުން ވަނީ މެޗުގެ 22 ވަނަ މިނެޓުގައި ލަނޑު ޖަހައި ލީޑު ނަގައިފަ އެވެ. ކެޕްޓަން އިލްކާއީ ގުންޑޮގާން ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ޒުވާން ކުޅުންތެރިޔާ ޖަމާލް މުސިއާލާ އެވެ. ޖަރުމަނުން އެ ޓީމުގެ ދެ ވަނަ ލަނޑު ޖެހީ މެޗުގެ ފަހު ހާފުގަ އެވެ. އެ ލަނޑު އެ ޓީމަށް ޖަހައިދިނީ ކެޕްޓަން ގުންޑޮގާން އެވެ. އޭގެ ފަހުން މެޗުގެ ވަކިި ހިސާބަކުން ގުންޑޮގާން ބަދަލު ކޮށްފައިވާއިރު، މެޗުގެ މޮޅު ކުޅުންތެރިޔަކަށް ހޮވުނީ ވެސް އޭނާ އެވެ.

މުބާރާތުގެ ގަދަ 16 ވަނަ ބުރުން ޖަރުމަނު ޖާގަ ހޯދިއިރު، އެ ޓީމު އޮތީ ވެސް ގްރޫޕްގެ އެއް ވަނައިގަ އެވެ. އެއީ މިހާތަނަށް ކުޅުނު ދެ މެޗުން ވެސް މޮޅުވެ، ހަ ޕޮއިންޓު ހޯދައިގެންނެވެ. ގްރޫޕް ސްޓޭޖުގެ ފަހު މެޗުގައި ޖަރުމަނު ނިކުންނާނީ ސްވިޒަލެންޑާ ދެކޮޅަށެވެ.