ވޯޓަރ ސްޕޯޓްސް އަށް ގެންގުޅޭ އުޅަނދުފަހަރު ގެންގުޅުމުގައި ދޭންވާ ސަމާލުކަން ނުދޭ މައްސަލަތައް ފާހަގަކުރެވޭ - ފުލުހުން
މޫދު ކުޅިވަރުގެ ހަރަކާތްތައް ވެސް އިންތިޒާމް ކުރަން ވާނީ އެންމެންގެ ސަލާމަތަށް ބަލައިގެން ކަމަށް އޭނާ ވަނީ ވިދާޅުވެފަ
ޗީފް ސުޕްރިންޓެންޑެންޓް އޮފް ޕޮލިސް އެންޑް ހެޑް އޮފް މެރިން ޕޮލިސް އިބްރާހިމް އަދުނާން އަނީސް
ވޯޓަރ ސްޕޯޓްސް އަށް ގެންގުޅޭ އުޅަނދުފަހަރު ގެންގުޅުމުގައި ދޭންވާ ސަމާލުކަން ނުދޭ މައްސަލަތައް ފާހަގަކުރެވޭކަމަށް ފުލުހުން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ޗީފް ސުޕްރިންޓެންޑެންޓް އޮފް ޕޮލިސް އެންޑް ހެޑް އޮފް މެރިން ޕޮލިސް އިބްރާހިމް އަދުނާން އަނީސް ވިދާޅުވީ ބައެއް މީހުން ވޯޓަރ ސްޕޯޓްސް އަށް ގެންގުޅޭ އުޅަނދުފަހަރު ދުއްވާއިރު ވަރަށް ޢައިރު ޒިންމާދާރު އަމަލުތައް ހިންގާކަން ފާހަގަކުރެވޭ ކަމަށެވެ. އެގޮތުން ފަޅުން ބޭރަށް އުޅަނދުގައި ނުކުތުމާއި މޫދުގައި ތިބޭ އެހެން މީހުންގެ ސަލާމަތަށް ނުރައްކާވާ ގޮތަށް އުޅަނދުތައް ދުއްވާކަން ފާހަގަކުރެވޭ ކަމަށް އަދުނާން ވިދާޅުވިއެވެ. އެފަދަ ކަންކަމުގެ ސަބަބުން ވަރަށް ފަސޭހައިން ސަލާމަތަށް ނުރައްކާވެދާނެކަމަށާއި، ނުރައްކާތެރި ހާދިސާއެއް ހިނގުމުގެ ކުރިން އެފަދަ ކަންކަމަށް އެކަށީގެންވާ ސަމާލުކަމެއް ދިނުން މުހިއްމު ކަމަށް އަދުނާން ވިދާޅުވިއެވެ. އަދި ކުޑަކުދިންނަށް އުޅަނދު ދުއްވަން ދިނުން ފަދަ ނުރައްކާތެރިކަންކަން ކުރަމުންދާ ކަމަށާއި އެއީ ބަލައިގަނެވޭ ކަމެއް ނޫން ކަަމަށް އޭނާ ވިދާޅުވިއެވެ. މޫދު ކުޅިވަރުގެ ހަރަކާތްތައް ވެސް އިންތިޒާމްކުރަން ވާނީ އެންމެންގެ ސަލާމަތަށް ބަލައިގެން ކަމަށް އޭނާ ވަނީ ވިދާޅުވެފައެވެ. ވޯޓަރ ސްޕޯޓްސް އުޅަނދުތައް ގިނަ އަދަދަކަށް ގެންގުޅޭ އިރު އެފަދަ ކަންކަން ކުރުމަކީ އެއީ އެންމެންގެ ސަލާމަތަށް އޮތް ނުރައްކަލެއްކަަމަށް އޭނާ ވިދާޅުވިއެވެ.
ވޯޓަރ ސްޕޯޓްސް އުޅަނދުތައް ދުއްވުމުގައި ގަވާއިދާއި ހިލާފުވާ ކަމަށް ޓްރާންސްޕޯޓް މިނިސްޓްރީން ވެސް ވަނީ ފާހަގަކޮށްފައެވެ. މާލެ ސަރަހައްދުގެ އިތުރުން އަތޮޅު ތެރޭގަ ވެސް އެފަދަ މައްސަލަތައް ފެންމަތިވާކަމަށް އެ ވުޒާރާއިން ވަނީ ބުނެފައެވެ.
