ސްކޭމްގެ މައްސަލަތައް ހުއްޓުވުމަށް ހާއްސަ ސެންޓަރެއް ގާއިމްކުރަން ނިންމައިފި
8 ޖޫން 2024 | ހޮނިހިރު 09:58މިއީ ދުނިޔޭގެ ބޮޑެތި ގައުމުތަކުގައި މިހާރު މަސައްކަތް ކުރާ ކޮންސެޕްޓް
ނޫސްވެރިންގެ ބައްދަލުވުމެއްގައި އެސިސްޓެންޓް ޕޮލިސް ކޮމިޝަނަރު އަހްމަދު ޝިފާން ވާހަކަދައްކަވަނީ
ސްކޭމްގެ މައްސަލަތައް އިތުރުވަމުންދާތީ އެކަމާ ދެކޮޅަށް މަސައްކަތް ކުރުމަށް ހާއްސަ ސެންޓަރެއް ގާއިމްކުރަން ނިންމައިފިއެވެ.
ދައުލަތުގެ މީޑިއާގައި ވާހަކަދައްކަވަމުން އެސިސްޓެންޓް ޕޮލިސް ކޮމިޝަނަރު އަހްމަދު ޝިފާން ވިދާޅުވީ މިހާރަކަށް އައިސް ރާއްޖޭގައި ސްކޭމްގެ މައްސަލަތައް ވަރަށް ބޮޑަށް އިތުރުވަމުންދާ ކަމަށާއި، އެކަން ހުއްޓުވުމަށް ހާއްސަ ސެންޓަރެއް ގާއިމްކުރަން ނިންމާފައިވާ ކަމަށެވެ.
ޝިފާން ވިދާޅުވީ މިސެންޓަރު ގާއިމްކުރެވުމުން ރާއްޖޭގެ ހުރިހާ ސަރަހައްދަކުން ވެސް ހުށަހެޅޭ ސްކޭމްގެ މައްސަލަތަކަށް ފުރަތަމަ އެޓެންޑްވާނީ އެ ސެންޓަރުން ކަމަށެވެ. އަދި ސްކޭމްގެ ހުރިހާ އެ މައްސަލަތައް ބަލަމުންދާނީ އެސެންޓަރަކުން ކަމަށެވެ.
މިއީ ދުނިޔޭގެ ބޮޑެތި ގައުމުތަކުގައި މިހާރު މަސައްކަތް ކުރާ ކޮންސެޕްޓެއްކަން ފާހަގަކުރައްވައި ޝިފާން ވިދާޅުވީ، އެންޓި ސްކޭމް ސެންޓަރުގެ ސަބަބުން ވިކްޓިމައިޒްވެފައި ހުންނަ މީހަކު އިތުރަށް ވިކްޓިމައިޒް ނުވުމަށް ކުރަންޖެހޭ ހުރިހާ މަސައްކަތެއް ވަގުތުން ކުރާނެ ކަމަށެވެ. މިއީ ލިބޭނެ ކުރިއެރުމެއް ކަމަށް ޝިފާން ވިދާޅުވިއެވެ.
މީގެ އިތުރުން ޝިފާން ވިދާޅުވީ، އެންޓި ސްކޭމް ސެންޓަރުގެ މަސައްކަތް ވަރަށް އަވަހަށް ފަށާނެ ކަމަށެވެ. ނަމަވެސް ތާރީހެއް ވިދާޅުވެފައިނުވެއެވެ.
ރާއްޖޭގައި ތަފާތު އެކިއެކި ކޮންސެޕްޓަށް ދަނީ ސްކޭމްތައް ހިންގަމުންނެވެ. މިމައްސަލަ އިންތިހާއަށް ބޮޑުވެފައިވާއިރު، 2021ން ފެށިގެން 31 ޖެނުއަރީ 2024އާ ހަމައަށް މިހާތަނަށް ގެއްލުނު ފައިސާގެ އަދަދު ގާތްގަނޑަކަށް 57.8 މިލިއަނަށް ވުރެ އިތުރު ކަމަށް ފުލުހުން ވަނީ ބުނެފައެވެ.
