ފަހަތުން އަރައި ޖަރުމަނުން ގްރީސް ބަލިކޮށްފި

ބައިނަލްއަޤުވާމީ ރަޙުމަތްތެރިކަމުގައި ގްރީސްއާ ދެކޮޅަށް ކުޅުނު މެޗުން ޖަރުމަނު މޮޅުވެއްޖެ އެވެ.

އަމިއްލަ ޤައުމުގައި މި މަހު ފަށާ ޔޫރޯ ފުޓުބޯޅަ މުބާރާތަށް ތައްޔާރުވުމުގެ ގޮތުން ޖަރުމަނުން ވަނީ ރަޙުމަތްތެރި ކަމުގެ ދެ މެޗު ކުޅެފަ އެވެ. ފުރަތަމަ މެޗުގައި ޔޫކްރެއިންއާ ވާދަކޮށް އެއްވަރުވީ އެވެ. ދެ ވަނަ މެޗުގައި ގްރީސްއާ ދެކޮޅަށް ނިކުތްއިރު، ޖަރުމަނު މޮޅުވީ ފަހަތުން އަރައި ދެ ލަނޑު ޖަހައިގެންނެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ގްރީސް އިންނެވެ. މެޗުގެ ފުރަތަމަ ހާފުގެ 33 ވަނަ މިނެޓުގައި އެ ޓީމަށް ލީޑު ނަގައިދިނީ ޖިއޯޖޮސް މަސޯރަސް އެވެ. ޖަރުމަނުން މެޗުގެ ނަތީޖާ ހަމަހަމަ ކުރުމަށް ކުރި މަސައްކަތް ކާމިޔާބުވީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން 11 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ކައި ހަވާޓްޒް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ލެރޯއީ ސާނޭ އެވެ. މެޗުން ޖަރުމަނު މޮޅުވީ، ފުރިހަމަ ވަގުތު ހަމަވާން މިނެޓަކަށްވެފައި ވަނިކޮށް، ޕަސްކަލް ގްރޮބް ޖެހި ލަނޑުންނެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގައި ބެންޗުންނެވެ.

މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި، މި މަހުގެ 15 ވަނަ ދުވަހު ޖަރުމަނުން ނިކުންނާނީ ސްކޮޓްލެންޑާ ދެކޮޅަށެވެ. އޭގެ ފަހުން ދެ ވަނަ މެޗުގައި ހަންގޭރީއާ ދެކޮޅަށް ނިކުންނާނީ 19 ވަނަ ދުވަހު އެވެ. ފަހު މެޗުގައި ސްވިޒަލެންޑާ ދެކޮޅަށް ނިކުންނާނީ 24 ވަނަ ދުވަހު އެވެ.