އެންޑޯރާ އަތުން ސްޕެއިން އަށް ފަސް ލަނޑުގެ މޮޅެއް

ބައިނަލްއަޤުވާމީ ރަޙުމަތްތެރިކަމުގައި އެންޑޯރާ ދެކޮޅަށް ކުޅުނު މެޗުން ސްޕެއިން ބޮޑު މޮޅެއް ހޯދައިފި އެވެ.

މި މަހު ޖަރުމަނުގައި ފަށާ ޔޫރޯ ފުޓުބޯޅަ މުބާރާތަށް ތައްޔާރުވުމުގެ ގޮތުން، ބުދަ ދުވަހުގެ ރޭ އެންޑޯރާ ދެކޮޅަށް ކުޅުނު މެޗު ސްޕެއިން އިން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި ސްޕެއިން އިން އެއް ލަނޑު ޖެހި ނަމަވެސް، ފަހު ހާފުގައި ވަނީ ހަތަރު ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 24 ވަނަ މިނެޓުގައި ސްޕެއިން އަށް ލީޑު ނަގައިދިނީ އަޔޯޒީ ޕެރޭޒް އެވެ. ދެ ވަނަ ހާފު ފަށައިގެން އަށް ވަނަ މިނެޓުގައި ސްޕެއިންގެ ދެ ވަނަ ލަނޑު ޖެހީ މިކޭލް އޮޔާޒަބާލް އެވެ. އޭގެ ފަހުން އޭނާ ވަނީ އިތުރު ދެ ލަނޑު ޖަހައި، މެޗުގައި އޭނާގެ ހެޓްރިކް ހަމަކޮށްފަ އެވެ. އެއީ 66 ވަނަ މިނެޓު އަދި 73 ވަނަ މިނެޓުގައި ލަނޑު ޖަހައިގެންނެވެ. މެޗުގައި ސްޕެއިންގެ ފަހު ލަނޑު، 81 ވަނަ މިނެޓުގައި ޖެހީ ފެރާން ޓޮރޭސް އެވެ.

މީގެ ކުރިން ތިން ފަހަރެއްގެ މަތީން ޔޫރޯ މުބާރާތް ކާމިޔާބު ކޮށްފައިވާ ސްޕެއިން، މިއަހަރުގައި ލައްވާލާފައި އޮތީ ވަރުގަދަ ގުރޫޕެއްގަ އެވެ. ސްޕެއިން އާއެކު ގްރޫޕް ބީގައި ހިމެނޭ ތިން ޓީމަކީ، އެންމެ ފަހުގެ ޗެމްޕިއަން އިޓަލީ، ކްރޮއޭޝިއާ އަދި އަލްބޭނިއާ އެވެ.