ޕެޕޭ ޕޯޓޯ ދޫކޮށްލުމުގެ ފުރުސަތު ބޮޑު
6 ޖޫން 2024 | ބުރާސްފަތި 05:04ޕޯޓޯގެ ވިސްނުން ހުރީ ޕެޕޭގެ އެއްބަސްވުން އިތުރު އެއް އަހަރަށް އައު ކުރުމަށް
ޕޯޓޯ އަށް ކުޅެމުން އަންނަ ޕެޕޭ
ޕޯޓޯ އަށް ކުޅެމުން އަންނަ ޕޯޗުގަލްގެ ތަޖުރިބާކާރު ޑިފެންޑަރު ޕެޕޭ، އެ ކުލަބު ދޫކޮށްލުމުގެ ފުރުސަތު ބޮޑު ކަމަށް މީޑިއާ ރިޕޯޓުތައް ބުނެފި އެވެ.
އުމުރުން 41 އަހަރުގެ ކުޅުންތެރިޔާ ޕޯޓޯ އަށް ބަދަލުވީ 2019 ވަނަ އަހަރު އެވެ. އެންމެ ފަހުން އެ ކުލަބާއެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ މި މަހުގެ ނިޔަލަށެވެ. އެހެންކަމުން ޕޯޓޯގެ ވިސްނުން ހުރީ ޕެޕޭގެ އެއްބަސްވުން އިތުރު އެއް އަހަރަށް އައު ކުރުމަށް ކަމަށް ވެސް ވަނީ ބުނެފަ އެވެ.
އެހެން ނަމަވެސް، ޕެޕޭގެ ވިސްނުން ހުރީ އެއްބަސްވުން އައު ކުރުމުގެ ބަދަލުގައި ޕޯޓޯ ދޫކޮށްލަން ކަމަށް ވަނީ ބުނެފަ އެވެ. އެކަމުގެ އެންމެ ބޮޑު ސަބަބެއްގެ ގޮތުގައި ބުނެފައި ވަނީ ޕޯޓޯގެ ކޯޗަކަށް ހުރި ސާޖިއޯ ކޮންސެއިސާއޯ އެ ކުލަބު ދޫކޮށްލަން ނިންމުމެވެ. މީޑިއާ ތަކުގައި ބުނެފައިވާ ގޮތުން، ޕެޕޭ ޕޯޓޯ ދޫކޮށްލަން ބޭނުން ވަނީ ކޮންސެއިސާއޯ އެ ޓީމާ ދުރަށް ދިޔުމުންނެވެ.
ޕޯޓޯ ދޫކޮށްލުމުގެ ވިސްނުން ޕެޕޭ ގެންގުޅެމުން އައި ނަމަވެސް، މިހާތަނަށް އެކަމުގައި ރަސްމީ އެއްވެސް ނިންމުމެއް ނިންމާފައި ނެތް ކަމަަށް ރިޕޯޓުތައް ބުނެ އެވެ. އެ ނިންމުން ނިންމުމުގެ ކުރިން، ޕޯޓޯ އާއެކު ޕެޕޭ މަޝްވަރާ ކުރާނެ ކަމަށް ވެސް ބުނެފައިވެ އެވެ. އަދި ކުލަބު ދޫކޮށްލަން ޕެޕޭ އެދިއްޖެ ނަމަ، ޕޯޓޯ އިން އެކަމަށް އެއްބަސްވާނެ ކަމަށް ވެސް ރިޕޯޓުތައް ބުނެ އެވެ.
ދެ ވަނަ ފަހަރަށް ޕޯޓޯ އަށް ބަދަލުވެ ޕެޕޭ ވަނީ އެ ކުލަބަށް ކުޅެދިން 201 މެޗުގައި ނުވަ ލަނޑު ޖަހައިފަ އެވެ. ދެ ވަނަ ފަހަރަށް ޕޯޓޯ އާއެކު އޭނާ ވަނީ ނުވަ ތައްޓެއް ކާމިޔާބު ކޮށްފަ އެވެ.
