ރައީސުލްޖުމްހޫރިއްޔާ، ރައްޔިތުންގެ މަޖިލީހުގެ ރައީސްއާ ބައްދަލުކުރައްވައިފި
މަޖިލީހުގެ 93 މެމްބަރުންގެ ތެރޭގައި، ސަރުކާރު ހިންގާ ޕީއެންސީގެ މެމްބަރުންގެ ގޮތުގައި އެކަނި ވެސް 75 މެމްބަރުން މަޖިލީހުގައި އެބަ ތިބި
ރައީސް ޑރ.މުއިއްޒު އާއި މަޖިލީހުގެ ރައީސް އަބްދުއްރަހީމް
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރައްޔިތުންގެ މަޖިލީހުގެ ރައީސް، ޢަބްދުއްރަޙީމް ޢަބްދުﷲ އާއި ބައްދަލުކުރައްވައިފިއެވެ.
މި ބައްދަލުކުރެއްވުން ކުރިއަށްދިޔައީ ހޯމަ ދުވަހުގެ ހެނދުނު ރައީސުލްޖުމްހޫރިއްޔާގެ އޮފީހުގައެވެ.
ރައީސް އޮފީހުން ބުނިގޮތުގައި އެ ބައްދަލުކުރެއްވުމުގައި ރައީސުލްޖުމްހޫރިއްޔާ އާއި ރައްޔިތުންގެ މަޖިލީހުގެ ރައީސް، ވަނީ މިވަގުތު ދިވެހިރާއްޖޭގެ ކަންކަން ބާރު ދުވެލީގައި ކުރިއަށް ގެންދިއުމަށް ކުރެވެންހުރި ކަންކަމާ ގުޅޭގޮތުން މަޝްވަރާކުރައްވާފައެވެ. އަދި އެ ދެބޭފުޅުންވަނީ ރާއްޖޭގެ އިޤްތިޞާދީ ދާއިރާގެ ކަންކަމާ ބެހޭގޮތުންނާއި، ތިމާވެއްޓަށް އަންނަ ބަދަލުތަކާއި، ތިމާވެށި ހިމާޔަތްކުރުމާ ގުޅޭގޮތުން ވެސް ފުޅާދާއިރާއެއްގައި މަޝްވަރާކުރައްވާފައެވެ.
މީގެ އިތުރުން މަޖިލީހުގެ ރައީސް ވަނީ މި ބައްދަލުކުރެއްވުމުގައި ސަރުކާރުން ދިވެހިރައްޔިތުންގެ ކުރިއެރުމަށް ކުރައްވަން ރާވާފައިވާ ކަންކަމުގައި، މަޖިލީހުގެ ފަރާތުން ބޭނުންވާނެ އެއްބާރުލުން ފުރިހަމައަށް ދެއްވާނެކަމުގެ ޔަޤީންކަން ދެއްވާފައެވެ.
20 ވަނަ މަޖިލީހުގައި އޮތީ މި ސަރުކާރުގެ މެޖޯރިޓީއެވެ. އެހެނީ މަޖިލީހުގެ 93 މެމްބަރުންގެ ތެރޭގައި، ސަރުކާރު ހިންގާ ޕީއެންސީގެ މެމްބަރުންގެ ގޮތުގައި އެކަނި ވެސް 75 މެމްބަރުން މަޖިލީހުގައި ތިބުމެވެ. އެހެންކަމުން މި މަޖިލިސް ވެގެންދާނީ ހިންގުންތެރިކަން ކުޑަ މަޖިލީހަކަށް ކަމަށް އެފަދަ ފަރާތްތަކުން ބުނެއެވެ. އަދި ސަރުކާރުން ބުނާހާ ގޮތަކަށް މަޖިލީސް ހިންގާނެ ކަމަށް ބުނެ އިދިކޮޅު ފަރާތްތަކުން ވެސް ދަނީ އެކަމާއި މެދު ކަންބޮޑުވުން ފާޅުކުރަމުންނެވެ.
