އެޓްލަންޓާ އަތުން މިއާމީ ބަލިވެއްޖެ

މޭޖާ ލީގު ސޮކާ (އެމެރިކާ ލީގު) ގައި އެޓްލަންޓާ ޔުނައިޓެޑާ ދެކޮޅަށް ކުޅުނު މެޗުން އިންޓަ މިއާމީ ބަލިވެއްޖެ އެވެ.

ބުރާސްފަތި ދުވަހުގެ ހެނދުނު ކުޅުނު މެޗުން މިއާމީ ބަލިވީ 3-1 އިންނެވެ. މި މެޗުގައި އެ ޓީމުގެ ކެޕްޓަން ލިއޮނަލް މެސީ ވަނީ ކުޅެފަ އެވެ. އޭގެ އިތުރުން އުރުގުއޭގެ ލުއިސް ސުއަރޭޒް އާއި، ސްޕެއިންގެ ސާޖިއޯ ބުސްކެޓްސް އަދި ޖޯޑީ އަލްބާ ވެސް މި މެޗުގައި ކުޅުނެވެ.

މެޗުގައި ފުރަތަމަ ދެ ލަނޑު ވެސް ޖެހީ އެޓްލަންޓާ އިންނެވެ. މެޗުގެ ފުރަތަމަ ހާފުގެ 44 ވަނަ މިނެޓުގައި އެ ޓީމަށް ލީޑު ނަގައިިދިނީ ސޮބާ ލޮބްޒަންޑީޒް އެވެ. އަދި ދެ ވަނަ ހާފު ފަށައިގެން 14 ވަނަ މިނެޓުގައި އޭނާ ވަނީ އިތުރު ލަނޑެއް ޖަހައި، އެޓްލަންޓާ އަށް ލީޑު ފުޅާ ކޮށްދީފަ އެވެ. ނަމަވެސް މެޗުގެ 62 ވަނަ މިނެޓުގައި މިއާމީގެ ކެޕްޓަން ލިއޮނަލް މެސީ ވަނީ ލަނޑު ޖަހައި އެ ޓީމަށް އުންމީދެއް ހޯދައިދީފަ އެވެ. އޭގެ ފަހުން އެޓްލަންޓާ އިން ވަނީ އެ ޓީމުގެ ތިން ވަނަ ލަނޑު ވެސް ޖަހައިފަ އެވެ. މެޗުގެ 73 ވަނަ މިނެޓުގައި އެ ލަނޑު ޖެހީ ޖަމާލް ތިއަރޭ އެވެ.

މިއީ މި ސީޒަންގެ ލީގުގައި މިއާމީގެ ތިން ވަނަ ބައްޔެވެ. އަދި ޖެހިޖެހިގެން ދިހަ މެޗުން މޮޅުވުމަށްފަހު، މިއާމީ ބަލިވި ފުރަތަމަ މެޗެވެ. ލީގުގައި މިހާތަނަށް މިއާމީން 17 މެޗު ކުޅެފައިވާއިރު، 10 މެޗުން ވަނީ މޮޅުވެފަ އެވެ. ތިން މެޗުން ބަލިވީއިރު، ހަތަރު މެޗު ވަނީ އެއްވަރުވެފަ އެވެ. މިހާތަނަށް 34 ޕޮއިންޓު ހޯދައިގެން މިއާމީ އޮތީ އެއް ވަނައިގަ އެވެ. މިއާމީ އަށް ވުރެ އެއް މެޗު މަދުން ކުޅެގެން ދެ ވަނައިގައި ސިންސިނާޓީ އަށް ލިބެނީ 33 ޕޮއިންޓެވެ.