މާފަރު ބަލިކޮށް ހިންނަވަރު ކުރިއަށް، ކޮމެޓްސް އިން ޅޮހީ ކޮޅަށް 9 ލަނޑު

ނ.ކެނދިކުޅުދޫ ކައުންސިލުން އެރަށުގައި ކުރިއަށް ގެންދާ 'މެންގްރޯވް އައިލެންޑް ޗެމްޕިއަންޝިޕް' ގައި މާފަރު ބަލިކޮށް, ހިންނަވަރުން ސެމީގެ ފުރުޞަތު ބޮޑުކުރިއިރު ކޮމެޓްސް އިން ޅޮހީ ކޮޅަށް 9 ލަނޑު ޖަހައިފިއެވެ.

ފުރަތަމަ މެޗުގައި އުނދަގޫ މޮޅެއް ހޯދި މާފަރުގެ މައްޗަށް ހިންނަވަރުން ކުރިހޯދީ 4-1 ނެވެ. ގައުމީ ޓީމްގެ ކުޅުންތެރިން ހިމެނޭ ހިންނަވަރުން މާފަރު ކޮޅަށް ފުރަތަމަ ލަނޑު ޖެހީ ގައުމީ ޓީމްގެ ކުރީގެ ޑިފެންޑަރ އަހުމަދު އަބްދުالله (ލިލީ) އެވެ. ހާފް ނިމުމުގެ ކުރިން ހިންނަވަރުގެ ދެވަނަ ލަނޑު ޖެހީ ލަންކާ ގައުމީ ޓީމްގެ ކަވިންދު އިޝާން އެވެ. ދެވަނަ ހާފްގައި ތިންވަނަ ލަނޑު ޕެނަލްޓީ އަކުން ޖެހީ އަލީ ނަސޫހު ރަޝީދު އެވެ. ހިންނަވަރުގެ ހަތަރު ވަނަ ލަނޑު ވެސް ޖެހީ ނަސޫހު އެވެ. ހަތަރު ވަނަ ލަނޑު ޖެހުމުގެ ކުރިން މާފަރުގެ އައިހަމް ލަނޑެއް ޖަހާ ސުން ކަނޑުވާލިއެވެ. މުބާރާތުގައި ހިންނަވަރު ވަނީ ކުޅުނު ތިން މެޗުވެސް ކާމިޔާބުކޮށްފައެވެ.

މުބާރާތުގައި ކެނދިކުޅުދޫ ކޮމެޓްސް ވަނީ ޅޮހީ 9-0 ން ބަލިކޮށްފައެވެ. މުބާރާތުގައި ފެންނަ އެންމެ ބަލި ޓީމަކީ ޅޮއްސެވެ. މެޗުގައި ކޮމެޓްސްއަށް ކުޅޭ ގައުމީ ޓީމްގެ މިޑްފީލްޑަރ އިބްރާހީމް ވަހީދު ހެޓްރިކެއް ހެދިއެވެ. ކޮމެޓްސް ވަނީ ފުރަތަމަ މެޗުގައި ހިންނަވަރު އަތުން ބަލިވެފައެވެ. ތިން މެޗުގެ ތެރެއިން ކޮމެޓްސް ވަނީ ދެ މެޗު ކާމިޔާބުކޮށްފައެވެ. މިމުބާރާތުގެ ފައިނަލް މެޗު ކުޅޭނީ މެއި މަހުގެ 6 ވަނަ ދުވަހު އެވެ.