މެންގްރޯވް ޗެމްޕިއަންޝިޕްގެ ފުރަތަމަ ދެ މެޗު މާޅެންދޫއާއި ހިންނަވަރަށް

ނ.ކެނދިކުޅުދޫގައި ކުރިއަށްގެންދާ 'ދަ މެންގްރޯވް އައިލެންޑް ޗެމްޕިއަންޝިޕް'ގެ ފުރަތަމަ ދެ މެޗު މާޅެންދޫއާއި ހިންނަވަރުން ކާމިޔާބުކޮށްފިއެވެ.

10 ޓީމް ވާދަކުރާ މުބާރާތުގެ ފުރަތަމަ މެޗު ކާމިޔާބުކުރީ އަވަށްޓެރި މާޅެންދޫންނެވެ. އެޓީމުން މެޗު ކާމިޔާބުކުރީ ޅޮހީ ފުޓްބޯޅަ ކްލަބާ ވާދަކޮށް 3-0 ނެވެ. މެޗުގެ މޮޅު ކުޅުންތެރިއަކީ މާޅެންދޫގެ އަޒުފާން މޫސާއެވެ. މުބާރާތުގެ ދެވަނަ މެޗު ހިންނަވަރު ސްޕޯރޓްސް ކްލަބުން ކާމިޔާބުކުރީ ކެނދިކުޅުދޫ ކޮމެޓްސް ސްޕޯރޓްސް ކްލަބާ ވާދަކޮށް 2-1 ނެވެ. މެޗުގެ މޮލޫ ކުޅުންތެރިއަކީ ހިންނަވަރު ޓީމަށް ކުޅޭ ގައުމީ ޓީމްގެ ފޯވާޑް އަލީ ފާސިރު (ސެންޓޭ) އެވެ.

ކެނދިކުޅުދޫ ކައުންސިލުން ބާއްވާ މުބާރާތުގައި ވާދަކުރާ 10 ޓީމް ވަނީ ދެ ގްރޫޕަކަށް ބަހާލާފައެވެ. ގްރޫޕް އޭގައި ހިމެނެނީ ހި ފުޓްބޯޅަ ކްލަބް, މާޅެންދޫ ފުޓްބޯޅަ ޓީމް, ހިންނަވަރު ސްޕޯރޓްސް ކްލަބް, ކޮމެޓްސް ސްޕޯރޓްސް ކްލަބް އަދި މާފަރު ފުޓްބޯޅަ ކްލަބެވެ. ގްރޫޕް ބީގައި ހިމެނެނީ ކުޑަފަރި ސްޕޯރޓްސް ކްލަބް, ކެނދިކުޅުދޫ ވިންޑް ވޮރިއޯސް, މަނަދޫ ސްޕޯރޓްސް ކްލަބް, ނައިފަރު ޗެލްސީ, އަދި ޑީ ޓޫ ސްޕޯރޓްސް ކްލަބެވެ.

މުބާރާތް މެއި މަހުގެ 6 ވަނަ ދުވަހުގެ ނިޔަލަށް ކެނދިކުޅުދޫގައި ކުރިއަށްދާނެއެވެ.