ފާޅުގައި ރިޝްވަތު ހިފުން އިންތިޚާބުތަކުގައި ޓްރެންޑަކަށްވަނީ

ވިހި ވަނަ ރައްޔިތުންގެ މަޖިލީހުގެ އިންތިޚާބުގެ ހުރިހާ ކަމެއްހެން ދިޔައީ ވަރަށް ފުރިހަމައަށެވެ. މައްސަލަތައް މަދު އަމާން އިންތިޚާބެކެވެ. އިލެކްޝަންސް ކޮމިޝަން (އީސީ)އިން ވެސް ވަނީ ވަރަށް ފުރިހަމައަށް އިންތިޒާމްތައް ހަމަޖައްސާފައެވެ. އެއްވެސް މީހެއްގެ ހައްގަށް އުނިކަމެއް ނާންނަ ގޮތަކަށެވެ. ނަމަވެސް އެހެން އިންތިޚާބުތަކާއި ހިލާފަށް މިފަހަރުގެ އިންތިޚާބުގައި ވަރަށް ތަފާތު ކަމެއް ފާހަގަކުރެވިގެންދިޔައެވެ. ބައެއް މީހުން ބުނާ ގޮތުންނަމަ އެހެން ފަހަރުފަހަރާއި ހިލާފަށް ހަދިޔާ ބެހުމުގެ މަސައްކަތާއި، މީހުންނަށް އެހީތެރިކަން ފޯރުކޮށްދީފައިވަނީ ވަރަށް ފާޅުގައެވެ.

މީގެ ކުރިން އިންތިޚާބުތަކާއި ގުޅިގެން ވެސް މިފަދަ ހަދިޔާތަކާއި، އެހީތެރިކަން ވަރަށް ގިނަ މީހުން ފޯރުކޮށްދެއެވެ. ނަމަވެސް އެކަންކަން ކުރަމުންދަނީ ދެން ހުންނަ މީހަކަށް ނޭނގޭ ގޮތަށް ވަރަށް ސިއްރުންނެވެ. އާއްމުކޮށް އިންތިޚާބުގައި ވާދަކުރާ ކެންޑިޑޭޓުންގެ ކެންޕޭން ޓީމުތަކުން އެހީގެ ފޮށިގަނޑުތައް ރަށްރަށަށް ވެސް އަރުވަނީ ރައްޔިތުން ނިދާ، ރަށުގެ ތެރެއަށް ހިމޭންކަން ވެރިވުމުން ދަންވަރުގެ ވަގުތުގައޭ ބުންޏަސް ދޮގަކަށްނުވާނެއެވެ.

ނަމަވެސް މިފަހަރުގެ ރައްޔިތުން މަޖިލީހުގެ އިންތިޚާބުގައި ހަދިޔާ ދިނުމާއި، އެހީތެރިކަން ފޯރުކޮށްދެމުންދިޔައީ ވަރަށް ފާޅުގައެވެ. އެއްވެސް ޖެހިލުމެއް ނެތި މީހުންތެރޭގައި ވެސް އެވާހަކަ ބައެއް މީހުން ދައްކާފައިވެއެވެ. 2500 ރުފިޔާއިން 20،000 ރުފިޔާއާ ހަމައަށް މީހުންނަށް ހަދިޔާގެ ގޮތުގައި ފައިސާ ދީފައިވެއެވެ. މީގެ އިތުރުން ރާއްޖެއިން ބޭރުގެ އެކި ގައުމުތަކަށް ދިއުމަށް ޓިކެޓު ހަދިޔާކޮށްފައިވެއެވެ. އަދި އަގުބޮޑެތި އެންމެ ފަހުގެ ފޯނާއި ލެޕްޓޮޕް ފަދަ ތަކެތި ހަދިޔާކޮށްފައިވެއެވެ.

ރާއްޖެއެމްވީއަށް މައުލޫމާތު ދިން ބައެއް މީހުން ބުނެފައިވަނީ ވޯޓުލާ މަރުކަޒުތައް ކައިރިން ވެސް މިފަދަ ހަދިޔާތައް ލިބިފައިވާ ކަމަށެވެ. ބައެއް އިންތިޚާބީ ކެންޑިޑޭޓުންގެ ކެންޕޭން ޓީމުގައި ހިމެނޭ ބައެއް މީހުން ކައިރިއަށް އައިސް ހާލު ބެލުމަށްފަހު، ބޭނުންވަނީ ކޮންކަމެއްތޯ އަހައި އޮޅުންފިލުވީ ވެސް ވޯޓުލާ މަރުކަޒު ކައިރިން ކަމަށް ބުނެފައިވެއެވެ. މިއީ ވަރަށް ފާޅުކަން ބޮޑު ގޮތެއްގައި ވަމުންދިޔަ އެހީތެރިކަމެއް ކަމަށް އެމީހުން ބުނެއެވެ. އަދި ބައެއް މީހުންނަށް ލިބިފައިވާ ހަދިޔާތައް ސޯޝަލްމީޑިޔާގައި "ސްނެޕް" ކޮށްލާފައިވަނީ ވެސް އެކަމާއި މެދު އެމީހުން ފަހުރިވެރިވާ ބީދައިންނެވެ.

ނަމަވެސް މިއީ ރިޝްވަތު ހުށަހެޅުމާއި، ރިޝްވަތު ގަބޫލުކުރުމެކެވެ. ވޯޓު ގަނެވިއްކުމެވެ. އިސްލާމް ދީނުގައި ހަރާމް ކަމެކެވެ. މިކަމުން ދުރުވުމަށް ވެސް ދީނުގައި ވަނީ ގޮވާލާފައެވެ. ރިޝްވަތުގެ ނަން ބަދަލުކޮށް ހަދިޔާގެ ނަން ދިން ނަމަވެސް އަސްލު އޮޅުވާލެވޭކަށްނެތެވެ. ހަގީގަތުގައި 100 ޕަސެންޓް އިސްލާމީ ގައުމެއްގައި މިކަން ހިނގައިގެންވާނެ ގޮތެއް ނޫނެއެވެ. ވަރަށް އާދައިގެ ކަމެއްގެ ގޮތުގައި ދެކެމުން ދިއުމަކީ ބިރުވެރިކަމެކެވެ. މިގޮތަށް މިކަން ހިނގާނަމަ ގައުމުގެ މުސްގުބަލް ވަރަށް ބަނައެވެ. ކަމާގުޅުންހުރި މުއައްސަސާތައް ވެސް ރަސްމީކޮށް މައްސަލަ ހުށަހެޅުމުން ނޫނީ ތަހުގީގުނުކުރާނަމަ މިގައުމުގައި ހަދިޔާ ބެހުން ރަނގަޅު އާދައަކަށް ބަދަލުވެ، ރިޝްވަތުމާނަ އޮޅުވާލުމަކީ ދުރުގައި އޮތް ކަމަކަށް ނުވާނެއެވެ.