މާލޭގެ ރައްޔިތުންނަށް ބަންޑާރަ ގޯތި ދިނުމަކީ ރައީސް މުއިއްޒުގެ ފިކުރެއް ނޫން: މެންބަރު ހުސައިން ޝަހީމް

މާލޭގެ ރައްޔިތުންނަށް ބަންޑާރަ ގޯތި ދިނުމަކީ ރައީސް ޑރ.މުހައްމަދު މުއިއްޒުގެ ފިކުރެއް ނޫން ކަމަށާއި، އެމަނިކުފާނު ގޯތިތައް ދޫކުރަން ބޭނުންނުވާނެ ކަމަށް ރައްޔިތުން މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަދުން ހުސައިން) ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ހުސެއިން ޝަހީމް ވިދާޅުވީ މާލޭގެ ރައްޔިތުންނަށް ބަންޑާރަ ގޯތި ދިނުމަށް ކުރީގެ ރައީސް އިބްރާހިމް މުހައްމަދު ޞާލިޙު ނިންމެވުމުން 19 ވަނަ ރައްޔިތުންގެ މަޖިލީހުން ގިނަ މަސައްކަތްތަކެއް ކޮށްފައިވާ ކަމަށެވެ.

ނަމަވެސް މިސަރުކާރުން އެގޯތިތައް ހިފެހެއްޓުމަށް މަސައްކަތް ކުރަމުންދާ ކަމަށް މެންބަރު ވިދާޅުވިއެވެ. އަދި ވިދާޅުވީ ގޯތީގެ އިތުރުން ގެދޮރުވެރިޔާ ސްކީމްގެ ދަށުން ދޫކޮށްފައިވާ ފްލެޓުތައް ވެސް ހިފަހައްޓާފައިވާ ކަމަށެވެ.

މެންބަރު ވިދާޅުވީ މާލޭގެ ރައްޔިތުންނަށް ބިން ދިނުމަކީ ރައީސް މުއިއްޒު އަދި ޕީއެންސީގެ ފިކުރެއް ނޫން ކަމަށެވެ. ރައްޔިތުންނާއި ގުޅުންހުރި ގިނަ ކަންކަމުގައި ވައުދުވެވަޑައިގަންނަވާއިރު، މާލޭގެ ރައްޔިތުންނަށް ބިންދޫކުރުމާއި ގުޅޭގޮތުން ރައީސް މުއިއްޒު ވާހަކަފުޅު ނުދައްކަވާ ކަމަށް މެންބަރު ވިދާޅުވިއެވެ.

މެންބަރު ވިދާޅުވީ މިހާރު ގޯތީގެ ރަޖިސްޓްރީ ދޫނުކުރާ ކަމަށާއި، ދޫކުރަމުންދަނީ އިގުރާރެއް ކަމަށެވެ. އެގޮތަށް ކަންތައް ކުރަނީ ބިން އަތުލާ ހާލަތުގައި ކޯޓަށް ދިޔަ ނަމަވެސް ކޭސް ވިން ނުކުރެވޭނެ ގޮތަށް ހެދުމަށް ކަމަށް މެންބަރު ވިދާޅުވިއެވެ.

މިސަރުކާރުގެ ހައުސިން މިނިސްޓަރު ޑރ. އަލީ ހައިދަރު އަށް އިޝާރާތް ކުރައްވައި މެންބަރު ވިދާޅުވީ މީގެކުރިން އެބޭފުޅާ ދިރިއުޅުއްވީ އިނގިރޭސިވިލާތުގައި ކަމަށާއި، ރާއްޖޭގައި ނޫން ކަމަށެވެ. އެހެންކަމުން މާލޭގައި ދިވެހި ރައްޔިތުން ދިރިއުޅޭ ހާލަތު އެނގިވަޑައިނުގަންނަވާނެ ކަމަށާއި، އުޅޭ ދަތި ހާލު އިހުސާސް ނުކުރެއްވޭނެ ކަމަށް މެންބަރު ވިދާޅުވިއެވެ.

މެންބަރު ވިދާޅުވީ ފްލެޓާއި ގޯތި ދޫނުކޮށް ލަސްކުރާ ކޮންމެ ދުވަހަކީ ރައްޔިތުންނަށް ވެވޭ ބޭއިންސާފެއް ކަމަށެވެ. ނަމަވެސް އަދިވެސް މަސައްކަތް ކުރަނީ ސިޔާސީ މަންފާއަށް ގޯއްޗާއި، ފްލެޓުތައް ހިފެހެއްޓުމަށް ކަމަށް މެންބަރު ވިދާޅުވިއެވެ.