މެޗު އެއްވަރުވުމަކީ ޙައްޤު ނަތީޖާއެއް: ޕޮޗެޓީނޯ

އިނގިރޭސި ޕްރިމިއާ ލީގުގައި ޝެފީލްޑް ޔުނައިޓެޑާ ދެކޮޅަށް ކުޅުނު މެޗުން ޗެލްސީ އެއްވަރުވުމަކީ، ޙައްޤު ނަތީޖާއެއް ކަމަށް ޗެލްސީގެ ކޯޗު މައުރީސިއޯ ޕޮޗެޓީނޯ ބުނެފި އެވެ.

ޝެފީލްޑް ޔުނައިޓެޑާ ދެކޮޅަށް ޗެލްސީން ކުޅުނު މެޗު އެއްވަރުވީ 2-2 އިންނެވެ. ޗެލްސީ އަށް ނަތީޖާ ނުނެރެވޭތީ، ޕޮޗެޓީނޯ އަށް ފާޑު ކިޔުންތައް އަމާޒުވެ އެވެ.

އެ މެޗަށް ފަހު ނޫސްވެރިންނާ ވާހަކަ ދައްކަމުން ޕޮޗެޓީނޯ ބުނީ، އެއީ ޙައްޤު ނަތީޖާއެއް ކަމަށާއި، އެއީ ހަމަހަމަ ނަތީޖާއެއް ކަމަށެވެ. އޭނާ ބުނީ ޗެލްސީގައި އޮތީ މުޅިން އައު ޓީމެއް ކަމަށާއި، އެ ޓީމުގައި ހިމެނޭ ކުޅުންތެރިން އަންނަނީ ކަންކަން ދަސްކުރަމުން ކަމަށެވެ. އެކަން ފާހަގަކޮށް ޕޮޗެޓީނޯ ބުނީ، އެއީ ޕްރޮސެސްއެއް ކަމަށާއި، އެކަން ފުރިހަމަވާން ވަގުތު ނަގާނެ ކަމަށެވެ. އެހެންކަމުން ތިން އަހަރު ނުވަތަ ފަސް އަހަރުގެ ތެރޭގައި، ބޭނުންވާ ފެންވަރުގެ ޓީމެއް ބިނާ ކުރެވޭނެ ކަމުގެ އުންމީދު އޮތް ކަމަށް ޕޮޗެޓީނޯ ވަނީ ބުނެފަ އެވެ.

މީގެ އިތުރުން ޕޮޗެޓީނޯ ބުނީ، ޓީމު އޮތީ ވާދަކުރެވޭ ޙާލަތެއްގައިތޯ ނުވަތަ ނޫންތޯ ދެނެގަތުމަކީ ކޯޗުގެ ޒިންމާއެއް ކަމަށެވެ. އެކަމަށް އިޝާރާތްކޮށް ޕޮޗެޓީނޯ ބުނީ، ކޮންމެ ތިން ދުވަހަކުން މެޗެއް ކުޅެވޭ ވަރަށް ޗެލްސީގެ ޓީމު ފިޓު ނުވެދާނެ ކަމަށެވެ. އެހެންކަމުން ދުރާލާ ކުރަމުން އަންނަ މަސައްކަތުގެ ތެރެއިން އެކަމަށް ވެސް ޙައްލު ލިބިގެންދާނެ ކަމަށް އޭނާ ވަނީ ބުނެފަ އެވެ.

މިހާތަނަށް ޕްރިމިއާ ލީގުގައި ކުޅުނު 30 މެޗުން ޗެލްސީ އަށް ލިބެނީ 44 ޕޮއިންޓެވެ. ލީގުގައި އެ ޓީމު އޮތީ ވެސް ތާވަލްގެ ނުވަ ވަނައިގަ އެވެ.