މަސްތުވާތަކެތި ބޭނުންކުރާ މީހުން މުޖުތަމައުއަށް ނެރުމަށް، ކޮމިއުނިޓީ ބޭސްޑް ރިހިބިލިޓޭޝަން ނިޒާމު ގާއިމްކުރާނަން: ރައީސް މުއިއްޒު
31 މާރިޗު 2024 | އާދީއްތަ 14:12ރާއްޖޭގެ އެކި ސަރަހައްދުތަކުގައި ރިހިބްލިޓޭޝަން މަރުކަޒުތައް ގާއިމްކުރާނަން
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
މަސްތުވާތަކެތީގެ ޝިކާރައަކަށްވެފައިވާ މީހުން މުޖުތަމައުއަށް ނެރުމަށް، ކޮމިއުނިޓީ ބޭސްޑް ރިހިބިލިޓޭޝަން ނިޒާމު ގާއިމްކުރާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މަސްތުވާތަކެތީގެ ބޭނުންކުރާ މީހުންނަށް ފަރުވާދީ އަނބުރާ މުޖްތަމައަށް ގެނައުމަށް ސަރުކާރުން ކުރާ މަސައްކަތްތަކާމެދު އާއްމު ރައްޔިތެއް ދެންނެވި ސުވާލަށް ރައީސް މުއިއްޒު ވިދާޅުވީ މިމުޖުތަމައުގައި އެންމެ ބޮޑުވެފައިވާ އެއް މައްސަލައަކީ ޑްރަގްގެ މައްސަލަ ކަމަށާއި، މިމައްސަލައަކީ އެތައް އަހަރެއް ވެފައިވާ އެކަށީގެންވާ ވަރުގެ ހައްލެއް ގެނެސްނުދެވިފައިވާ ބޮޑު މައްސަލައެއް ކަމަށެވެ.
ރައީސް މުއިއްޒު ވިދާޅުވީ މަސްތުވާތަކެތީގެ ޝިކާރައަކަށްވެފައިވާ މީހުން މުޖުތަމައުއަށް ނެރުމަށް އެންމެ ރަނގަޅު މުހިންމު ހައްލަކީ ކޮމިއުނިޓީ ބޭސްޑް ރިހިބިލިޓޭޝަން ކަމަށާއި، އެގޮތަށް ކުރިއަށް ގެންދާނެ ކަމަށެވެ.
ރާއްޖޭގެ އެކި ސަރަހައްދުތަކުގައި ރިހިބްލިޓޭޝަން މަރުކަޒުތައް ގާއިމްކުރާނެކަން ފާހަގަކުރައްވައި ރައީސް މުއިއްޒު ވިދާޅުވީ ރަނގަޅު ފެންވަރުގައި ކުދިން އަނބުރާ ރަނގަޅުކޮށް މުޖުތަމައުއަށް ނެރޭވޭނެ ގޮތަށް އެމަރުކަޒުތައް ގާއިމްކުރާނެ ކަމަށެވެ. އަދި އެމަރުކަޒުތައް އެޅުމަށް ވަކި ރަށްތަކެއް ކަނޑައަޅާފައިވާ ކަމަށް ރައީސް މުއިއްޒު ވިދާޅުވިއެވެ.
މީގެ އިތުރުން 02 ޖެނުއަރީ 2024 ގައި ކ.ކާށިދޫ، ނ.ވެލިދޫ އަދި ލ.އަތޮޅުގައި ރިހިބިލިޓޭޝަން ފަރުވާ ދިނުމަށް މަރުކަޒު ގާއިމު ކުރުމަށާއި، ގާނޫނާ އެއްގޮތަށް ފަރުވާދޭ މަރުކަޒުތައް ހިންގުމުގެ ހުއްދަ ދިނުމަށް ވެސް ރައީސް މުއިއްޒު ވަނީ ނިންމަވާފައެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ވެސް ވަނީ މަސްތުވާތަކެތީގެ ޝިކާރައަކަށް ވެފައިވާ މީހުންނަށް އަމާޒުކޮށް، ފަރުވާގެ ގިނަ ޕްރޮގްރާމްތައް ހިންގާފައެވެ. އެގޮތުން ގިނަ އަދަދެއްގެ މީހުން ފަރުވާ ފުރިހަމަ ކުރުމަށްފަހު މުޖުމަތައުއަށް ނުކުމެފައިވެއެވެ. އަދި ރާއްޖޭގެ އެކިސަރަހައްދުތަކުގައި ފަރުވާ ދެވޭނެ ނިޒާމު ގާއިމްކުރުމުގެ ގޮތުން ޚާއްސަ ސެންޓަރުތައް ގާއިމްކޮށްފައިވެއެވެ. އެގޮތުން ގަން ކްލިނިކްގައި ފަރުވާދެވޭ ގޮތް ހަމަޖައްސާފައިވާއިރު، ކ. ހިންމަފުށީ ޓްރީޓްމެންޓް އެންޑް ރިހެބިލިޓޭޝަން ސެންޓަރާއި، ކ. ގުޅި ސެންޓްރަލް ޑިޓޮކްސިފިކޭޝަން ސެންޓަރު ޚިދުމަތް ފުޅާކޮށްފައިވެއެވެ.
ސ. ހުޅުދޫގައި ވިލުނު ނަމުގައި ސެންޓަރެއް، ގއ. ވިލިނގިލި ދަގެނާ ކޮމިއުނިޓީ ރިހެބިލިޓޭޝަން ސެންޓަރެއް، ހުޅުދޫ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ސެންޓަރު، ފުވައްމުލަކު ސިޓީގެ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ސެންޓަރު އަދި ހިތަދޫ ޑްރަގް ޓްރީޓްމަންޓް އެންޑް ޑިޓޮސްކްސިފިކޭޝަން ސެންޓަރު ގާއިމްކޮށް ޚިދުމަތްތައް ދޭން ފަށާފައިވެއެވެ.
