އިނގިރޭސި ޕްރިމިއާ ލީގުގައި ލޫޓަން ޓައުނާ ދެކޮޅަށް ކުޅުނު މެޗުން މޮޅުވެ، ޓޮޓެންހަމުން ގަދަ ހަތަރެއްގެ އުންމީދު ހިފަހައްޓައިފި އެވެ.

ހޮނިހިރު ދުވަހުގެ ރޭ ޓޮޓެންހަމްގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. އެއީ މެޗުގައި ލޫޓަން ޓައުން އިން ލަނޑު ޖަހާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ.

މެޗު ފަށައިގެން ތިން ވަނަ މިނެޓުގައި ލޫޓަން ޓައުން އިން ލީޑު ނެގި އެވެ. އެ ޓީމަށް ލީޑު ނަގައިދިނީ ތަހިތު ޗޮންގް އެވެ. ނަމަވެސް ދެ ވަނަ ހާފު ފަށައިގެން ކުރީ ކޮޅު ލޫޓަން ޓައުންގެ އިސާ ކަބޯ އަތުން ބައި ކޮޅަށް ވަތް ލަނޑުން ޓޮޓެންހަމަށް މެޗުގެ ނަތީޖާ ހަމަހަމަވީ އެވެ. އޭގެ ފަހުން މެޗުގެ 86 ވަނަ މިނެޓުގައި މެޗުން ޓޮޓެންހަމް މޮޅުކޮށްދިނީ ސޮން ހެއުން މިން އެވެ. އޭނާ އެ ލަނޑު ޖެހީ ބްރެނާން ޖޯންސަން ތަނަވަސްކޮށްދިން ފުރުސަތެއްގަ އެވެ.

މެޗުން މޮޅުވެ ޓޮޓެންހަމް އޮތީ ފަސް ވަނައިގަ އެވެ. އެއީ މިހާތަނަށް ލީގުގަައި ކުޅުނު 29 މެޗުން 56 ޕޮއިންޓާއެކު އެވެ. ހަތަރު ވަނައިގައި އޮތީ އެސްޓަން ވިލާ އެވެ. ޓޮޓެންހަމް އަތުން ބަލިވި ލޫޓަން ޓައުން އޮތީ 22 ޕޮއިންޓާއެކު ރެލިގޭޝަން ޒޯނުގަ އެވެ.