ކުއްލިއަކަށް އިންޑިއާ ސިފައިން ފޮނުވާނުލައި، ޑިޕްލޮމެސީގެ ރީތި އުސޫލު އިސްކުރަންޖެހޭ، މަޝްވަރާ އިސްކުރަންޖެހޭ: ރައީސް
23 މާރިޗު 2024 | ހޮނިހިރު 10:54މިފަދަ ކަންކަމުގައި އަމަލުކުރެވޭނެ ރިވެތި އުސޫލުތަކެއް އޮންނާނެކަމަށް ރައީސް ވިދާޅުވި
ރައީސުލްޖުމްހޫރިއްޔާ ޑރ މުޙައްމަދު މުއިއްޒު
ކުއްލިއަކަށް ސިފައިން ފޮނުވާލަން އެންގުމުގެ ބަދަލުގައި މިފަދަ ކަންކަމުގައި އަމަލުކުރެވޭނެ ރިވެތި އުސޫލުތަކެއް އޮންނާނެކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެއްޖެއެވެ.
މިހާރު ނޫހަށް ދެއްވި އިންޓަރވިއުއެއްގައި ރައީސް ވިދާޅުވީ، ކުރީ ސަރުކާރުން އިންޑިއާ ސަރުކާރާއެކު ހަދާފައިވާ އެއްބަސްވުމެއްގެ ތެރެއިން އިންޑިއާގެ އެހީތެރިކަން ރާއްޖެއަށް ފޯރުކޮށްދީފައިވާ ކަމަށެވެ.
އަދި މިއަދު ސަރުކާރުން ކުރަމުންދާ މަސައްކަތަކީ ރައްޔިތުންގެ ނިންމުމާއި އެއްގޮތަށް މިތަނުގައި އިންޑިއާ ސިފައިން ނުތިބޭނެކަން ކަށަވަރު ކުރުންކަމަށް ރައީސް ވިދާޅުވިއެވެ. ނަމަވެސް ކުއްލިއަކަށް ސިފައިން ފޮނުވާލަން އެންގުމުގެ ބަދަލުގައި މިފަދަ ކަންކަމުގައި އަމަލުކުރެވޭނެ ރިވެތި އުސޫލުތަކެއް އޮންނާނެކަމަށް ރައީސް ވިދާޅުވިއެވެ.
ކަންކަމުގައި ޑިޕްލޮމެސީގެ ރީތި އުސޫލު އިސްކުރަންޖެހޭ ކަމަށާއި، މަޝްވަރާ އިސްކުރަން ޖެހޭކަމަށްވެސް ރައީސް ވިދާޅުވިއެވެ.
ރައީސް މުއިއްޒު ވިދާޅުވީ، އެމަނިކުފާނުވެސް ބޭނުންފުޅު ވަނީ އިންޑިއާގެ މަދަނީންގެ ބަދަލުގައިވެސް ދިވެހިން މި އުޅަނދުތައް އޮޕަރޭޭޓް ކުރުމަށް ކަމަށެވެ. ނަމަވެސް އެކަމުގައި އުނދަގޫތަކެއް ހުރިނަމަ މަރުޙަލާތަަކަކަށް ބަހާލައިގެން އެކަން ކުރުމުން މައްސަލައެއް އޮތްކަމަށް ދެކިވަޑައިނުގަންނަވާކަމަށްވެސް ރައީސް ވިދާޅުވިއެވެ.
ރައީސް އިތުރަށް ވިދާޅުވީ، އިންޑިއާއާއެކު އަބަދުވެސް ގާތް ގުޅުމެއް އޮންނަން ބޭނުންވާކަަމަށެވެ.
