ޕޮޗެޓީނޯ ބުނަނީ ޗެލްސީ އަށް ބޭނުން ވަނީ އިތުބާރު ކަމަށް!

ޗެލްސީ އަށް ބޭނުން ވަނީ އިތުބާރު ކަމަށް، އެ ޓީމަށް އިރުޝާދު ދެމުން އަންނަ އާޖެންޓީނާގެ މައުރީސިއޯ ޕޮޗެޓީނޯ ބުނެފި އެވެ.

އޭނާ މިހެން ބުނީ އިނގިރޭސި އެފްއޭ ކަޕްގެ ކުއާޓާ ފައިނަލްގައި ކުޅުނު މެޗުން މޮޅުވެ، ޗެލްސީން މުބާރާތުގެ ސެމީ ފައިނަލަށް ދަތުރު ކޮށްފައި ވަނިކޮށެވެ. އިނގިރޭސިވިލާތުގެ ވެމްބްލީ ސްޓޭޑިއަމްގައި ކުޅޭ ސެމީ ފައިނަލް މެޗުގައި ޗެލްސީ ނިކުންނާނީ، މެންޗެސްޓަރ ސިޓީއާ ދެކޮޅަށެވެ.

ޗެލްސީއާ ގުޅޭ ގޮތުން ވާހަކަ ދައްކަމުން ޕޮޗެޓީނޯ ބުނީ، އެމީހުން މަސައްކަތް ކުރަމުން ދަނީ މުޅިން އައު ޗެލްސީއެއް ބިނާ ކުރުން ކަމަށް މީހުން ޤަބޫލު ކުރަން ޖެހޭނެ ކަމަށެވެ. އޭނާ ބުނީ މި ފާއިތުވެ ދިޔަ ނުވަ މަސް ދުވަހަށް ބަލާއިރު، ތަފާތު ދެ މުބާރާތެއްގައި ޗެލްސީން ވެމްބްލީ ސްޓޭޑިއަމަށްދާ ކަމަށެވެ. މީގެ ކުރިން ޗެލްސީން ވަނީ ކަރަބޯ ކަޕްގެ ފައިނަލްގައި ވެސް ވާދަކޮށްފަ އެވެ. ވެމްބްލީ ސްޓޭޑިއަމްގައި ލިވަޕޫލާ ދެކޮޅަށް ކުޅުނު މެޗުން ޗެލްސީ ބަލިވީ 1-0 އިންނެވެ.

މީގެ އިތުރުން ޕޮޗެޓީނޯ ބުނީ، ޗެލްސީ އަށް ލިބިފައިވާ ވަގުތުތަކުގެ ބޭނުން އެންމެ ރަނގަޅު ގޮތުގައި ހިފަން ޖެހޭނެ ކަމަށެވެ. އަދި ކުރިއަށް ދާން ޗެލްސީން ކުރަމުން އަންނަ މަސައްކަތުގައި އެންމެ ބޮޑަށް ބޭނުން ވަނީ އިތުބާރު ކަމަށް ވެސް އޭނާ ބުންޏެވެ. އިތުބާރާއެކު ކުރާ ކޮންމެ މަސައްކަތެއްގައި ވެސް ކާމިޔާބު އޮންނާނެ ކަމަށް ވެސް ޕޮޗެޓީނޯ ވަނީ ފާހަގަކޮށްފަ އެވެ.

މިދިޔަ ސީޒަންގައި ވެސް ނަތީޖާތައް ދަށްވެފައި އޮތް ޗެލްސީގެ ކޯޗުކަމަށް، ޕޮޗެޓީނޯ ހަމަޖެއްސީ އައު ސީޒަނާ ދިމާކޮށެވެ. ނަމަވެސް އޭނާގެ އިރުޝާދުގެ ދަށުން ވެސް ޗެލްސީ އަށް ނަތީޖާ ނުނެރެވޭތީ ކުލަބުގެ ސަޕޯޓަރުން ދަނީ ކަންބޮޑުވުން ފާޅު ކުރަމުންނެވެ. ޚާއްސަކޮށް މި ސީޒަންގެ އިނގިރޭސި ޕްރިމިއާ ލީގުގައި ޗެލްސީ އަށް ނަތީޖާ ނުނެރެވެ އެވެ. ލީގުގައި ޗެލްސީ އޮތީ ވެސް 11 ވަނައިގަ އެވެ.