މަކިޓާ 15 ވަނަ އިންޓަ ސްކޫލް ސްވިމިން ކޮމްޕެޓިޝަންގެ ނަތީޖާ ހޮނިހިރު ދުވަހު ފާޅުކުރާނެ ކަމަށް ސްވިމިން އެސޯސިއޭޝަނުން ބުނެފި އެވެ.

މުބާރާތުގައި މިހާތަނަށް ބައެއް އިވެންޓްތަކުގެ ވަނަވަނައަށް އައި ފެތުންތެރިން ކަށަވަރުވެފައިވާއިރު، ހޮނިހިރު ދުވަހު ވެސް ފައިނަލްތައް ކުރިޔަށްދާނެ ކަމަށް އެ އެސޯސިއޭޝަނުން ބުނެއެވެ.

މުބާރާތުގެ 14 އަހަރުން ދަށުގެ 100 މީޓަރު ބެކްސްޓްރޯކް އިވެންޓުގެ ފިރިހެން ބައިގެ އެއްވަނަ މަޖީދިއްޔާ ސްކޫލްގެ ހުސެއިން ހާއިޝް ހޯދާފައިވާއިރު، އަންހެން ބައިން އެއްވަނަ ހޯދީ ޖަމާލުއްދީން ސްކޫލްގެ ހަމްނާ އަހުމަދެވެ. 16 އަހަރުން ދަށުގެ 100 މީޓަރު ބެކްސްޓްރޯކްގެ އަންހެން ބައިން އިސްކަންދަރު ސްކޫލްގެ އައިޝަތު އުލްޔާ ޝާއިގް އެއްވަނަ ހޯދާފައިވާއިރު، ފިރިހެން ބައިން އެއްވަނަ ހޯދީ ދަރުމަވަންތަ ސްކޫލްގެ އަލީ އިމާން އެވެ. 19 އަހަރުން ދަށުގެ ބެކްސްޓްރޯކް އިވެންޓުގެ ފިރިހެން ބައިން ސީއެޗްއެސްސީގެ ސަމޫހް ފަރްހަތް އެއްވަނަ ހޯދިއިރު، އަންހެން ބައިން އެއްވަނަ ހޯދީ ސީއެޗްއެސްސީގެ ފާތިމަތު ޒުހާ ޒިޔާދް އެވެ.

19 އަހަރުން ދަށުގެ 100 މީޓަރު ބްރެސްޓްރޯކް ބައިގެ ފިރިހެން ބައިން އެއްވަނަ ހޯދީ ސީއެޗްއެސްސީގެ އިބްރާހިމް ޝައްމާހް ރިޔާޒް އެވެ.

މަކީޓާ، އިންޓަރ ސްކޫލް ފެތުމުގެ 15 ވަނަ މުބާރާތުގައި ވާދަކުރާ 15 ސްކޫލުން އަދި 2 ވަނަ ކިޑްސް ސްވިމިންގ ފެސްޓިވަލްގައި ވާދަކުރާ 13 ސްކޫލުން ޖުމްލަ 424 ފެތުންތެރިނާ އެކު އެކި އުމުރުފުރާގެ އަންހެން އަދި ފިރިހެން 99 ޓީމް ވަނީ ބައިވެރިކޮށްފައެވެ. މި މުބާރާތުގައި 234 އިވެންޓް ކުރިއަށްދާނެއެވެ.