ފަހު މިނިޓްގައި ޔުނައިޓެޑުން ލިވަޕޫލް ރޮއްވާލައިފި

އެފްއޭކަޕް ފުޓްބޯޅަ މުބާރާތުގައި އެކްސްޓްރާ ޓައިމްގެ ފަހު މިނިޓްގައި ޖެހި ގޯލުން 4-3އިން ލިވަޕޫލް ބަލިކޮށް، މެންޗެސްޓާ ޔުނައިޓެޑް ކުއާޓާ ފައިނަލަށް ކަޑައްތުކޮށްފި އެވެ.

މެޗުގެ ފުރަތަމަ ގޯލު ޖެހީ 0 ވަނަ މިނިޓްގައި ސްކޮޓް މެކްޓޮމިނޭ އެވެ. އެކަމަކު ފުރަތަމަ ހާފު ނިމެން މިނިޓަކަށް ވެފައިވަނިކޮށް އެލެކްސިސް މެކްއަލިސްޓާ އަދި އިތުރު ވަގުތުގައި މުހައްމަދު ސަލާހް ޖެހި ލަނޑުން ލިވަޕޫލް ޗޭންޖިން ރޫމަށް ދިޔައީ ލީޑުގައި އޮވެ އެވެ. ޔުނައިޓެޑަށް ނަތީޖާ ހަމަހަމަކޮށްދިނީ މެޗު ނިމެން ފަސް މިނިޓަށްވީ ފަހުން ބްރެޒިލްގެ ފޯވަޑް އެންތަނީ އެވެ.

ނަތީޖާ ނެރެން ކުޅުނު ދެ ހާފުގެ ތެރެއިން ފުރަތަމަ ހާފުގައި ހާވޭ އެލިއޮޓް ލިވަޕޫލަށް ލީޑް ނަގައިދިން ނަމަވެސް 112 ވަނަ މިނިޓްގައި މާކަސް ރަޝްފޯޑް ނަތީޖާ ހަމަހަމަކޮށް، ޔުނައިޓެޑް މޮޅުކޮށްދިނީ ފަހު މިނިޓްގައި އަމަޑް ޑިއާލޯ ޖެހި ގޯލުންނެވެ.

މެޗަށް ފަހު ލިވަޕޫލްގެ ކޯޗު ޔާގެން ކްލޮޕް ބުނީ އޭނާގެ ޓީމުގެ ފަރާތުން ވަރުބަލިކަން ފެނުނު ކަމަށާއި ހަތަރު ދުވަސް ތެރޭގައި ދެ ވަނަ މެޗެއް ކުޅެން ޖެހުމުން އެހެންވާނެ ކަމަށެވެ.

އޭނާ ބުނީ މި މެޗުން ބަލިވިޔަސް ޕްރެމިއާ ލީގާއި ޔޫރޮޕާ ލީގު ކާމިޔާބުކުރަން އޭނާގެ ކުޅުންތެރިން އާ ހިތްވަރަކާއެކު ފަށައިގަންނާނެ ކަމަށެވެ.

ޔުނައިޓެޑްގެ ކެޕްޓަން ބްރޫނޯ ފެނާންޑޭޒް ބުނީ ޓީމުގައި ތިބީ ޒުވާން ކުޅުންތެރިން ނަމަވެސް ފެންވަރު ހުރިކަން މި މެޗުން ފެނިގެން ހިނގައްޖެ ކަމަށެވެ.

ކޯޗު އެރިކް ޓެންހަގް ބުނީ މި މެޗުގެ ފުރަތަމަ 30 މިނިޓްގައި އޭނާގެ ޓީމުން ދެއްކީ މުޅި ސީޒަނުގައި ވެސް ދެއްކި އެންމެ މޮޅު ކުޅުން ކަމަށެވެ.

އިނގިރޭސި އެފްއޭކަޕުގެ ސެމީ ފައިނަލަށް ދިޔައީ މެންޗެސްޓާ ސިޓީ އާއި ޗެލްސީ އަދި ކޮވެންޓްރީ ސިޓީ އެވެ.