ސިޓީން ރެއާލާ ދެކޮޅަށް، ގާޑިއޯލާ ހުރީ އުންމީދުގައި

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި ރެއާލް މެޑްރިޑާ ދެކޮޅަށް ނިކުންނަން ޖެހޭއިރު، މެންޗެސްޓަރ ސިޓީގެ ކުޅުންތެރިންނާމެދު އިތުބާރު ބޮޑު ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

މުބާރާތުގެ އެންމެ ފަހުގެ ޗެމްޕިއަން ސިޓީން ރެއާލާ ދެކޮޅަށް ނިކުންނަން ޖެހުނުއިރު، ގާޑިއޯލާ ސިފަ ކުރި ގޮތުގައި އެއީ އާދަޔަކަށް ވެފައިވާ ކަމެކެވެ. މިދިޔަ ދެ ސީޒަންގައި ވެސް ސިޓީން ވަނީ ރެއާލާ ދެކޮޅަށް ކުޅެފަ އެވެ. މިދިޔަ ސީޒަންގައި ސިޓީން ފުރަތަމަ ފަހަރަށް ޗެމްޕިއަންސް ލީގު ތަށި އުފުލާލިއިރު، އެ މުބާރާތުގައި ސިޓީން ވަނީ ރެއާލްގެ މައްޗަށް ކުރި ހޯދައިފަ އެވެ. 14 ފަހަރު މުބާރާތް ކާމިޔާބު ކޮށްފައިވާ ރެއާލަކީ، ޗެމްޕިއަންސް ލީގުގެ އެންމެ ކާމިޔާބު ޓީމެވެ.

އެކަމާ ގުޅޭ ގޮތުން ވާހަކަ ދައްކަމުން ގާޑިއޯލާ ބުނީ ސިޓީ އަށް އެ ނޫން އެހެން ގޮތެއް ނެތް ކަމަށެވެ. އޭނާ ބުނީ ޗެމްޕިއަންސް ލީގުގެ ރަސްގެންފާނުންނާ ދެކޮޅަށް، ޖެހި ޖެހިގެން ތިން އަހަރު ނިކުންނަން ޖެހުމަކީ އާދަޔާ ޚިލާފު ކަމެއް ކަމަށެވެ. ނަމަވެސް އޭނާގެ އުންމީދަކީ ރެއާލާ ދެކޮޅަށް ނިކުންނައިރު ރަނގަޅު ގޮތެއްގައި ޓީމު އޮތުން ކަމަށް ގާޑިއޯލާ ވަނީ ބުނެފަ އެވެ. އަދި ފުރަތަމަ ލެގުގެ މެޗުގެ ކުރިން ފަރިތަކޮށްލުމަށް ވެސް އެކަށީގެންވާ ވަގުތު ލިބޭނެ ކަމަށް އޭނާ ބުންޏެވެ.

މީގެ އިތުރުން އޭނާ ބުނީ ޗެމްޕިއަންސް ލީގުގެ ގުރު ނެގުމަކީ އެއްވެސް މީހަކަަށް ކޮންޓްރޯލް ކުރެވޭނެ ކަމެއް ނޫން ކަމަށެވެ. އޭނާ ބުނީ މުބާރާތުގެ މި ގުރަކީ ފަސޭހަ ގުރެއް ކަމަށް ދެކުމަކީ، އިދިކޮޅަށް ކުޅެން އޮތް ޓީމު މާ ބޮޑަށް ފަސޭހަ ކޮށްލުން ކަމަށެވެ. އެކަން ފާހަގަކޮށް ގާޑިއޯލާ ބުނީ، ޗެމްޕިއަންސް ލީގުގައި ރެއާލަކީ ކޮންމެ ބައެއްކަން އެއްވެސް މީހަކު ބުނެދޭން ނުޖެހޭނެ ކަމަށެވެ. ނަމަވެސް ސިޓީގެ ކުޅުންތެރިން އޭނާގެ ފުރިހަމަ އިތުބާރާއި ޔަގީންކަން އޮތް ކަމަށް ވެސް ގާޑިއޯލާ ބުންޏެވެ.

މުބާރާތުގެ ކުއާޓާ ފައިނަލްގެ ފުރަތަމަ ލެގުގައި ރެއާލްގެ ދަނޑުގައި، ސިޓީން އެ ޓީމާ ދެކޮޅަށް ނިކުންނާނީ އަންނަ އޭޕްރީލް މަހުގެ 10 ވަނަ ދުވަހު އެވެ. ސިޓީގެ އަމިއްލަ ދަނޑުގައި ކުޅޭ ދެ ވަނަ ލެގު އޮންނާނީ އެ މަހުގެ 18 ވަނަ ދުވަހު ސިޓީގެ އަމިއްލަ ދަނޑުގަ އެވެ.