ރިޝީ ސުނަކްގެ މައިދައިތަ ވެސް ޕާލިއަމެންޓަށް

އިގިރޭސި ބޮޑުވަޒީރު ރިޝީ ސުނަކްގެ މައިދައިތަ ސުދާ މުރުތީ އިންޑިޔާގެ ޕާލިއަމެންޓަށް ވެންނެވުމަށް ނޮމިނޭޓްވެ ވަޑައިގެންފިއެވެ. ފިލަންތްރޮފިސްޓް، އުމުރުފުޅުން 73 އަހަރުގެ ސުދާ މުރުތީ އަކީ އިންޑިޔާގެ ބިލިއަނަރ އަދި ބިޔަ ޓެކް ކުންފުނި "އިންފޯސިސް" ގެ ކޯފައުންޑަރ ނަރަޔާނަން މުރުތީ ގެ އަނބިކަނބަލުންނެވެ.  ސުދާ އަދި މރ. ނަރަޔާނަން ގެ ދަރިކަނބަލުން އަކްޝަތާ އަކީ ސުނަކްގެ އަނބި ކަނބަލުންނެވެ.

އިންޑިޔާގެ މަޖިލީހުގެ މަތިގެ ނުވަތަ ސެނެޓަށް މެންބަރުން ހޮވަނީ ވޯޓުންނެވެ. ނަމަވެސް 12 މެމްބަރުން ހޮވުމުގެ އިޚްތިޔާރު ރައީސަށް ލިބިގެންވެއެވެ. މިގޮތުން ހޮވާ ބޭފުޅުންނަކީ ފާހަކަގަކޮށްލެވޭ ކާމިޔާބީތައް ހޯއްދަވާފައިވާ އަދި ގައުމަށް ރީތިނަން ހޯދާދީފައިވާ ފަރާތްތައް ކަމަށް ވެއެވެ.

ސުދާ މުރުތީ މަޖިލީހަށް ހޮވިވަޑައިގަތުމުން ބޮޑުވަޒީރު ނަރެންދުރަ މޯދީ ވިދާޅުވީ ސުދާ ހޮވިވަޑައިގަތުމަކީ "ނާރީ ޝަކްތީ" ނުވަތަ އަންހެނުންގެ ބާރު ދައްކާދޭ މިސާލެއް ކަމަށެވެ.އަދި ގައުމުގެ މުސްތަގްބަލް ކަނޑައެޅުމުގައި އަންހެނުންގެ ދައުރު ދައްކާދޭ ކަމެއްކަމަށް ވިދާޅުވިއެވެ. އެކްސްގައި ކުރެއްވި ޕޯސްޓެއްގައި މޯދީ އިތުރަށް ވިދާޅުވީ އިޖްތިމާއީ،ތައުލީމީ އަދި ފިލަންތްރޮފީ ފަދަ ތަފާތު ދާއިރާ ތަކުން ސުދާމުރުތީ ގައުމަށް ކޮށްދެއްވާފައިވާ ޚިދުމަތްތަކަކީ ފާހަގަ ކޮށްލެވޭ އެކަމުން ހިތްވަރު އާލާވާފަދަ ޚިދުމަތް ތަކެއް ކަމުގައެވެ.

ސުދާ މުރުތީ ވެސް ވަނީ ގައުމަށް ޚިދުމަތް ކުރެއްވުމަށް މިފަދަ ފުރުސަތެއް ލިބިވަޑައިގެންނެވީތީ ސަރުކާރަށް ޝުކުރު އަދާކުރައްވާފައެވެ. ދަ ހިންދޫ ނޫހަށް ސުދާ ވިދާޅުވީ މަޖިލީހަށް ނޮމިނޭޓްވިކަން އެނގިވަޑައިގަތުމުން "ސަރޕްރައިޒް" ވި ކަމަށާ ޚާއްސަ ކޮން އަންހެނުންގެ ދުވަހު އެކަން ލިބުމަކީ ޚާއްސަ ޝަރަފެއް ކަމުގައެވެ. މީގެ އިތުރުން ޕާލިއަމެންޓްގެ ދައުރުގައި ކުރައްވާނެ މަސައްކަތްތައް އަދި ކަނޑަނާޅުއްވާ ކަމަށާ ނަމަވެސް އިންޑިޔާގެ ރައްޔިތުންނަށް އެންމެ ރަގަޅަށް ޚިދުމަތް ކޮށްދެވޭނީ ކޮން ގޮތްތަކަކުންތޯ ބައްލަވާނެ ކަމަށް ވިދާޅުވިއެވެ.

ސުދާމުރުތީ ވަނީ ގިނަ ފޮތްތަކެއް ލިއުއްވާ އަދި އަންހެނުން ބާރުވެރި ކުރެއްވުމުގެ ގޮތުން ތަފާތު ޕްލެޓްފޯތަކުގައި ތަގްރީރުތައް ދެއްވާފައެވެ.  

ފޯބްސް މަޖައްލާއިން ބުނާ ގޮތުގައި ސުދާގެ ފިރިކަލުން ނަރަޔާނަން މުރުތީގެ މުދަލުގެ އަގު 4.7 ބިލިއަން ޑޮލަރަށް އަރައެވެ. އޭނަ އުފެއްދެވި ޓެކް ކުންފުނި އިންފޯސިސް އަކީ މިއަދު އިންޑިޔާގެ ހަތް ވަނަޔަށް އެންމެ ބޮޑު ކުންފުންޏެވެ. އަދި އިންފޯސިސްއަކީ ނިއުޔޯކް ސްޓޮކް އެކްސްޗޭންޖްގައި ފުރަތަމަޔަށް ލިސްޓް ކުރެވުނު އިންޑިޔާގެ ކުންފުންޏެކެވެ.

ތައުލީމީ ހަޔާތް ނިންމަވާލެއްވުމަށް ފަހު ސުދާ މުރުތީ ތަމްރީން ވެވަޑައިގަތީ އެންޖިމިއަރިންގ ގެ ރޮގުންނެވެ. އޭރު މުޅި ބެޗްގައިވެސް އަންހެނަކަށް ހުންނެވީ ސުދާއެކަނި ކަމަށް އޭނާ ވިދާޅުވެފައި ވެއެވެ.

މިދިޔަ އަހަރު ސަރުކާރުން ވަނީ ސުދާ މުރުތީ އަށް ޕަދްމާ ބޫޝަން ނުވަތަ ތިންވަނަޔަށް އެންމެ މަތީ ސިވިލިއަން އޮނާ އަރުވާފައެވެ. އެއީ އިޖްތިމާއީ ދާއިރާއިން މީހުން ހޭލުންތެރި ކުރެއްވުމަށް ސުދާ ކުރައްވަމުން ގެންދަވާ މަސައްކަތް ޕުޅަށެވެ.

ސުދާމުރުތީ އަކީ ގިނަ ޓޯލްޝޯތަކަކުން ފެންނަ މޫނެއްކަމުން އިންޑިޔާގެ ގިނަބަޔަކު ދަންނަ މޫނެކެވެ.