ރަނގަޅަށް މަސައްކަތް ނުކުރާނަމަ ސިވިލް ސަރވިސް މުވައްޒަފުންގެ މުސާރައިން އެބައި އުނިކުރާނެކަމަށް ރިޝީ ސުނާކު ވިދާޅުވެއްޖެ

އިނގިރޭސިވިލާތުގެ ސިވިލް ސަރވިސްގައި މަސައްކަތްކުރާ ފަރާތްތަކުން "ރޯލްސް ރޯއިސް"ހާ ހަލުވި ސްޕީޑުގައި ޚިދުމަތް ދޭން ޖެހޭނެކަމަށާއި، އެގޮތަށް މަސައްކަތްނުކުރެވޭ މުވައްޒަފުންގެ މުސާރައިން އެބައި އުނިކުރާނެކަމަށް، އެ ގައުމުގެ ބޮޑުވަޒީރުގެ ރޭހުގައި ވާދަކުރައްވާ ރިޝީ ސުނާކު ވިދާޅުވެއްޖެއެވެ.

ސްކޮޓްލެންޑަށް ވަޑައިގެން ސުނާކް ވިދާޅުވީ، މުސާރަ ދޭއިރު ބަލާނީ ޚިދުމަތް ދޭ ސްޕީޑާއި ޚިދުމަތުގެ ފެންވަރަށް ކަމަށެވެ. އެއްވެސް ފެންވަރެއް ނެތި ބޯނަސް ދިނުން ގަބޫލުފުޅުނުކުރައްވާ ކަމަށްވެސް އޭނާ ވިދާޅުވިއެވެ.

ސުނާކު ވިދާޅުވީ، ކޮވިޑަށްފަހު އިނގިރޭސިވިލާތް އޮތީ ވަރަށް ބޮޑަށް ރަނގަޅުކުރަންޖެހޭ ހާލަތެއްގައި ކަމަށެވެ. އެހެންކަމުން ޚިދުމަތްތެރި، މަސައްކަތަށް ފަރުވާތެރި ސިވިލް ސަރވިސް މުވައްޒަފުން އުފެއްދުމަކީ އޭނާގެ ބޮޑުވަޒީރު ކަމުގައި ކުރައްވާނެ ކަމެއް ކަމަށް ވިދާޅުވިއެވެ. އެގޮތުން މަގާމުތަކުން މީހުން ވަކިކޮށް، އެ މަގާމުތަކަށް ކުޅަދާނަ މީހުން ނަގަންޖެހިއްޖެ ހާލަތުގައި އެކަންވެސް ކުރައްވާނެ ކަމަށް ވިދާޅުވިއެވެ.

އޭނާގެ ޕްލޭން ހާމަކުރައްވައި ސުނާކް ވިދާޅުވީ، ސީނިއަރ ސްޓާފުންވެސް "އަސްލު ދުނިޔޭގައި" 12 މަސް ހޭދަކުރަން ޖެހޭނެ ކަމަށެވެ. އަދި އެއީ ކުރިއެރުން ބޭނުންވާ ކޮންމެ މީހަކުވެސް ކުރަންޖެހޭނެ ކަމެއް ކަމަށްވެސް ވިދާޅުވިއެވެ.

ސުނާކު މިހެން ބުނެފައިވަނީ ބޮޑުވަޒީރުކަމަށް އޭނާއާ ވާދަކުރައްވާ ލިޒް ޓްރޫސް ބޭކާރު ޚަރަދުތައް ކުޑަކުރައްވާނެ ކަމަށް ވިދާޅުވެފައިވަނިކޮށެވެ. ޓްރޫސް ވިދާޅުވީ ބޭކާރު ޚަރަދުގެ ގޮތުގައި 8.8 ބިލިއަން ޔޫރޯ ހޭދަވުން ހުއްޓާލަން ނިންމަވާފައިވާ ކަމަށެވެ.