ހުޅުމާލެ ލޯކަލް މާރުކޭޓް ގޮޅިތައް ދޫކުރަން އަނެއްކާވެސް ހުޅުވާލައިފި
ދެ މަސް ދުވަހުގެ މުއްދަތަކަށް 16 ގޮޅި ދޫކުރުމަށް ނިންމާފައިވޭ
ލޯކަލް މާރުކޭޓް
ހުޅުމާލެ ދެވަނަ ފިޔަވަހީގައި ގާއިމުކޮށްފައިވާ ވަގުތީ ލޯކަލް މާރުކޭޓުގެ ގޮޅިތައް ދޫކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން އަނެއްކާވެސް އިއުލާންކޮށްފިއެވެ.
އެޗްޑީސީން ކުރި އިއުލާނެއްގައި ބުނީ މިދިޔަ މަހުގެ ތެރޭގައި އެ މާރުކޭޓުގެ ގޮޅިތައް ކުއްޔަށް ދޫކުރުމަށް ހުޅުވާލި އިއުލާނަށް އެއްވެސް ފަރާތަކުން ކުރިމަތިލާފައިނުވާ ކަމަށެވެ. އެހެންވެ، ގޮޅިތައް ހޯދަން ފޯމް ހުށަހެޅުމުގެ ފުރުސަތު އަލުން ހުޅުވާލީ ކަމަށް އެ ކޯޕަރޭޝަނުން ބުންޏެވެ.
އެޗްޑީސީއިން ބުނީ ގޮޅި ހިންގުމަށް ދޫކުރާނީ އެއްވެސް ކުއްޔެއް ނުދައްކާ ގޮތަށް ކަމަށެވެ. އެގޮތުން ދެ މަސް ދުވަހުގެ މުއްދަތަކަށް 16 ގޮޅި ދޫކުރުމަށް ނިންމާފައިވާ ކަމަށް އެ އިއުލާނުގައިވެއެވެ.
ފޯމު ހުށަހަޅާ ފަރާތްތަކުގެ ޝަރުތުތަކުގެ ތެރޭގައި ދިވެއްސަކަށްވުމާއި އުމުރުން 18 އަހަރުވެފައިވާ މީހަކުކަމުގައިވުމާއި ހުޅުމާލެއަށް ރަޖިސްޓްރީވެފައިވާ ރަށްވެސަކަށްވުން ހިމެނެއެވެ.
ގޮޅިތައް ކުއްޔަށް ނެގުމަށް ޝައުގުވެރިވާ ފަރާތްތަކުގެ ފޯމް ބަލައިގަންނާނީ އަންނަ ހޮނިހިރު ދުވަހުގެ ހެނދުނު 9:30އިން 11:00އަށް ހުޅުމާލެ ޣާޒީ ސުކޫލު ހޯލުގައެވެ.
އެޗްޑީސީއިން ބުނީ ހޮނިހިރު ދުވަހުގެ 11:00 އާ ހަމައަށް ދޫކޮށްފައިވާ ނަންބަރުތަކަށް ފޯމު ބަލައިގަތުމަށް ފަހު، ގޮޅިތައް ދޫކުރުމަށް ގުރުނެގުން އޮންނާނެ ކަމަށެވެ.
