މެންޗެސްޓަރ ސިޓީ ކްއާޓާ ފައިނަލަށް

ޔުއެފާ ޗެމްޕިއަންސް ލީގުގެ ކްއާޓާ ފައިނަލުން އެންމެ ފަހުގެ ޗެމްޕިއަން މެންޗސްޓަރ ސިޓީ ޖާގަ ޔަގީން ކޮށްފިއެވެ.

ކްއާޓާ ފައިނަލްގެ ޖާގަ ސިޓީން ޔަގީން ކުރީ ދެވަނަ ބުރުގެ ދެވަނަ ލެގުގައިވެސް އެފްސީ ކޯޕަން ހޭގަން ފަސޭހައިން ބަލިކޮށްގެންނެވެ. ސިޓީގެ ދަނޑުގައި ކުޅުނު ދެވަނަ ލެގު ކާމިޔާބުކުރީ 3-1 ނެވެ. ފުރަތަމަ ލެގު ކާމިޔާބުކުރީވެސް ހަމަ މިނަތީޖާއިންނެވެ. ދެވަނަ ލެގުގައި ސިޓީން ތިން ލަނޑު ވެސް ޖެހީ ފުރަތަމަ ހާފްގައެވެ. ފުރަތަމަ ލަނޑު ޖަހާ ލީޑް ނަގައިދިނީ ޑިފެންޑަރ އަކަންޖީ އެވެ. އޭނާ ލީޑް ނެގީ 5 ވަނަ މިނިޓްގައެވެ. އޭގެ ތިން މިނިޓް ފަހުން ދެވަނަ ލަނޑު ޖެހީ އަލްވަރޭޒް އެވެ. ފުރަތަމަ ލަނޑު ޖަހަން ފުރުޞަތު ތަނަވަސްކޮށްދިނީވެސް އަލްވަރޭޒް އެވެ. 29 ވަނަ މިނިޓްގައި ކޯޕަން ހޭގަންއިން ލަނޑެއް ޖަހާ ފަރަގު ކުޑަކޮށްފައި ވަނިކޮށް, ސިޓީން އަލުން ލީޑް ފުޅާކުރީ ފުރަތަމަ ހާފްގެ އިތުރު ވަގުތުގައެވެ. ރޮޑްރީ ތަނަަވަސްކޮށްދިން ފުރުޞަތަކުން ލަނޑު ޖެހީ ހާލަންޑެވެ. މިއީ މުބާރާތުގައި ހާލަންޑްގެ ހަ ވަނަ ގޯލެވެ. މިއަދަދަށް މުބާރާތުގައި ދެން ލަނޑު ޖަހާފައިވަނީ ބަޔާންގެ ހެރީ ކޭންއާއި ޕީއެސްޖީގެ އެމްބާޕޭ އެވެ. ސީޒަންގައި ހާލަންޑްގެ ޖުމްލަ އަކީ 29 އެވެ.

މިއީ ސިޓީން މުބާރާތުގެ ކްއާޓާ ފައިނަލަށް ދަތުރުކުރި ހަތްވަނަ ފަހަރެވެ. އަދި ޗެމްޕިއަންސް ލީގުގައި ވިދިވިދިގެން ހޯދި 10 ވަނަ މޮޅެވެ. މުބާރާތުގައި ވިދިވިދިގެން 10 މޮޅު ހޯދި އިނގިރޭސި ހަމައެކަނި ޓީމަކީވެސް ސިޓީއެވެ. ސިޓީއަށް ކުރިއަށް އޮތީ ޕްރިމިއަރ ލީގުގައި ލިވަޕޫލާ ވާދަކުރާ މެޗެވެ. ޕޮއިންޓެއްގެ ފަރަގަކާއެކު މިވަގުތު ލީގު ތާވަލްގެ އެއްވަނައިގައި އޮތީ ލިވަޕޫލެވެ. ސިޓީ އޮތީ ދެވަނައިގަ އެވެ.