11 އަހަރު ކުރިން ހިނގި އެކްސިޑެންޓެއްގައި މަރުވި މީހެއްގެ މަރުގެ ދިޔައިގެ ގޮތުގައި އެއް މިލިއަން ރުފިޔާ ދިނުމަށް ހުކުމްކޮށްފި
އެކްސިޑެންޓް ހިނގާފައިވަނީ 06 މެއި 2013 ގައި
ކްރިމިނަލް ކޯޓް
11 އަހަރު ކުރިން ހިނގި އެކްސިޑެންޓެއްގައި މަރުވީ މީހެއްގެ މަރުގެ ދިޔައިގެ ގޮތުގައި އެއް މިލިއަން ރުފިޔާ ދިނުމަށް ކްރިމިނަލް ކޯޓުން ޙުކުމްކޮށްފިއެވެ.
މި އެކްސިޑެންޓު ހިނގާފައިވަނީ 2013 ވަނަ އަހަރުގައެވެ. މި އެކްސިޑެންޓުގެ މައްސަލައިގައި ދައުލަތުން ދައުވާ އުފުލާފައިވަނީ ޅ. ނައިފަރު، ރޭދުވާގެ އަޙްމަދު ޤައްސާމުގެ މައްޗަށެވެ. އެގޮތުން އެއްގަމުގައި ދުއްވާ އުޅަނދުތައް ދުއްވުމާބެހޭ ޤާނޫނާއި ޚިލާފުވެފައިވާތީ ޤާނޫނުލް އުޤޫބާތުގެ ދަށުން މިމީހާގެ މައްޗަށް ދައުލަތުން އުފުލާފައިވާ ދައުވާއަކީ އަމުރަށް ނުކިޔަމަންތެރިވުމުގެ ކުށުގެ ދައުވާއެވެ.
މި މައްސަލައިގައި ހުކުމްކުރުމަށް ކްރިމިނަލް ކޯޓުގައި ބޭއްވި އަޑުއެހުމުގައި ބުނެފައިވަނީ، ދައުވާއާއި ގުޅިގެން ބޭއްވުނު އަޑުއެހުމުގައި ދައުވާ ލިބޭ ޤައްސާމުގެ ބަހުންނާއި، ދައުލަތުން ހުށަހެޅި ހެކިންގެ ހެކިބަހުންނާއި، އަދި ހުށަހެޅި ޤަރީނާތަކުން ޝަރީޢަތަށް ސާބިތުވާތީ ޝަރީއަތުން ބަލައިގަނެފައިވާ ކަމަށެވެ.
މި އެކްސިޑެންޓް ހިނގައިދިޔަ ގޮތަށް ބަލާއިރު، މި އެކްސިޑެންޓު ހިނގާފައިވަނީ 06 މެއި 2013 ވަނަ ދުވަހުގެރޭ ދަންވަރު 00:30 ހާއިރު ބުރުޒުމަހުން އިރުން ހުޅަނގަށް ބާރު ސްޕީޑުގައި ދުއްވާފައިދިޔަ ސައިކަލު ބުރުޒުމަގާއި ބަޑިފަސްގަނޑު މަގާ ގުޅޭ ހަތަރު އަނގޮޅިން ހުރަސްކުރަން އުޅުމުގެ ތެރޭ، ބަޑިފަސްގަނޑުމަގުން އައި ސައިކަލެއްގައި ޖެހިގެންނެވެ. މި އެކްސިޑެންޓުގެ ސަބަބުން އަނިޔާ ލިބުނު އަންހެން މީހާއަށް ލަންކާ ހޮސްޕިޓަލުގައި ފަރުވާދެމުން ދަނިކޮށް ވަނީ ނިޔާވެފައެވެ. މިއީ ޤައްސާމު ބަލަންވާވަރަށް ނުބަލާ ހަތަރުއަނގޮޅިއަށް ނުކުތުމުން ހިނގައިދިޔަ އެކްސިޑެންޓެއްކަމުން މިކަމުގައި ޤައްސާމުގެ މައްޗަށް ކޮށްފައިވަނީ އަމުރަށް ނުކިޔަމަންތެރިވުމުވެ ދަޢުވާއެވެ.
ޤާނޫނު ނަންބަރު 66/1 (ދިވެހިރާއްޖޭގެ ޤާނޫނުލްޢުޤޫބާތު) ގެ 88 ވަނަ މާއްދާގެ (ހ) ގެ ދަށުން، މި އެކްސިޑެންޓުގައި ނިޔާވެފައިވާ ފަރާތުގެ ވާރިޘުން މަރުގެ ދިޔަ ބޭނުންވާކަމަށް ބުނެފައިވާތީ، މަރުގެ ދިޔައިގެ ގޮތުގައި 1،000،000 ރުފިޔާ އެއް އަހަރު ދުވަހުގެ ތެރޭގައި ސިވިލް ކޯޓަށް ދެއްކުމަށް ޣައްސާމަށް ވަނީ ޙުކުމް ކޮށްފައެވެ. އަދި މީގެ އިތުރުން މި އެކްސިޑެންޓުގެ ސަބަބުން ފަރުވާދެމުންދަނިކޮށް ނިޔާވި ފަރާތުގެ ބޭސްފަރުވާ ކުރުމަށް ދިޔަ ޚަރަދާއި ގެއްލުމުގެ ބަދަލު ހޯދަން އާއިލާއިން އެދިފައިވާތީ، ޝަރީޢަތުން އަދަބު ކަނޑައެޅުމުގައި ޢަމަލުކުރާނެ ގޮތުގެ އުސޫލުގެ 48 ވަނަ މާއްދާގެ (ޅ) ގެ ދަށުން، ގެއްލުމުގެ ބަދަލު ހޯދުމަށް މަދަނީ ދަޢުވާ ކުރުމުގެ ޙައްޤު އޮތްތަކަމަށް ވަނީ ކްރިމިނަލް ކޯޓުން ކަނޑައަޅާފައެވެ.
