ޕެނަލްޓީގައި ގާފަރު ބަލިކޮށް، އޭދަފުށި ފައިނަލަށް!

މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖުގެ ސެމީ ފައިނަލްގެ ދެ ވަނަ މެޗުގައި ކ.ގާފަރު ބަލިކޮށް، ބ.އޭދަފުށިން މުބާރާތުގެ ފައިނަލްގެ ފަހު ޖާގަ ހޯދައިފި އެވެ.

ހޯމަ ދުވަހުގެ ރޭ ހުޅުމާލެ ރެހެންދި ފުޓްސަލް ދަނޑުގައި ކުޅުނު ސެމީ ފައިނަލްގެ ދެ ވަނަ މެޗުގެ ފުރިހަމަ ވަގުތު ހަމަވީ ދެ ޓީމު 2-2 އިން އެއްވަރުވެގެންނެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ގާފަރުންނެވެ. އެ ޓީމަށް ލީޑު ނަގައިދިނީ އަލީ މާއިސް އެވެ. އޭގެ ފަހުން މެޗު ނިމެން ކައިރިވެފައި ވަނިކޮށް، އޭދަފުއްޓަށް ނަތީޖާ ހަމަހަމަ ކޮށްދިނީ އަލީ ފާޞިރު (ސެންޓޭ) އެވެ. އޭގެ ފަހުން ގާފަރުން ލީޑު ނެގީ އޭދަފުށިން ކުރި ފައުލަކާ ގުޅިގެން ލިބުނު ޕެނަލްޓީ ކާމިޔާބު ކޮށްގެންނެވެ. ދެ ވަނަ ފަހަރަށް ގާފަރަށް ލީޑު ނަގައިދިނީ ޝަނާން ރަޝާދު އެވެ. މެޗު ނިމެން ސިކުންތު ކޮޅަކަށް ވެފައި ވަނިކޮށް، އޭދަފުއްޓަށް ނަތީޖާ ހަމަހަމަ ކޮށްދިނީ ނިޝާމް މުޙައްމަދު ރަޝީދު (ޕޮގްބާ) އެވެ. އޭނާ ފޮނުވާލި ބޯޅަ ގޯލަށް ވަނީ ގާފަރު ގޯލު ކީޕަރުގެ އަތުގައި ޖެހިފަ އެވެ.

ނަތީޖާ ނެރުމަށް ޖެހި ޕެނަލްޓީގައި އޭދަފުށިން ކުރި ހޯދީ 4-3 އިންނެވެ. އޭދަފުށީގެ ސެންޓޭ، މުޙައްމަދު ފާސިރު، ހައިޝަމް ޙަސަން އަދި އިޝާން އިބްރާހީމްގެ ޕެނަލްޓީތައް ވަނީ ކާމިޔާބު ކޮށްފަ އެވެ. ގާފަރަށް ކާމިޔާބު ކުރެވުނު ތިން ޕެނަލްޓީ އަކީ، ސާމިން މުޙައްމަދު ނަސީރު، އައްޒާމް ނިޔާޒު އަދި އަޒްޔަން އިބްރާހީމްގެ ޕެނަލްޓީ އެވެ.

ފައިނަލްގައި އޭދަފުށިން ނިކުންނާނީ އެންމެ ފަހުގެ ޗެމްޕިއަން ލ.ގަމާ ދެކޮޅަށެވެ.