ކ. މާލެ
|
4 މާރޗް 2024 | ހޯމަ 05:59
ބާސެލޯނާ އިން ކުޅުނު މެޗުގައި އަނިޔާގެ ސަބަބުން ޑި ޔޯން ދަނޑުން ބާލަނީ
ބާސެލޯނާ އިން ކުޅުނު މެޗުގައި އަނިޔާގެ ސަބަބުން ޑި ޔޯން ދަނޑުން ބާލަނީ
ރޮއިޓާރސް
ސްޕެނިޝް ލީގު
ޑި ޔޯން އަދި ޕެޑްރީ އަށް އަނިޔާވި މެޗުން ބާސެލޯނާ އެއްވަރު!
 
އެންމެ ފަހުގެ ޗެމްޕިއަން ބާސެލޯނާ އޮތީ ލީގު ތާވަލްގެ ތިން ވަނަ މަގާމުގައި

ސްޕެނިޝް ލީގުގައި އެތުލެޓިކް ބިލްބާއޯއާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން ބާސެލޯނާ އެއްވަރުވީއިރު، ބޮޑު މާޔޫސްކަމަކާ ކުރިމަތިލާން ޖެހިއްޖެ އެވެ.

އާދިއްތަ ދުވަހުގެ ރޭ ބިލްބާއޯގެ ދަނޑުގައި ކުޅުނު މެޗު ނިމުނީ، އެއްވެސް ޓީމަކަށް ލަނޑެއް ނުޖެހި އެވެ. ނަމަވެސް މެޗުގައި ބާސެލޯނާގެ މުހިންމު ދެ ކުޅުންތެރިޔަކަށް އަނިޔާވެ، ވަނީ ބަދަލު ކުރަން ޖެހިފަ އެވެ.

މެޗު ފަށައިގެން 26 ވަނަ މިނެޓުގައި، ބާސެލޯނާ އަށް ކުޅެމުން އަންނަ ނެދަލެންޑްސްގެ ފްރެންކީ ޑި ޔޯން އަށް ވަނީ އަނިޔާވެފަ އެވެ. ކަކުލަށް ލިބުނު އަނިޔާއެއްގެ ސަބަބުން، މެޗުގެ ބާކީ ބައި ފުރިހަމަ ކުރެވޭ ގޮތް ޑި ޔޯން އަށް ނުވި އެވެ. އެކަމުގެ ސަބަބުން އޭނާ ބަދަލުކޮށްފައިވާއިރު، ޑި ޔޯންގެ ބަދަލުގައި ކުޅެން ނިކުމެފައި ވަނީ ފާމިން ލޮޕޭޒް އެވެ.

ދެ ވަނަ ހާފު ފަށައިގެން ކުރީ ކޮޅު، ބާސެލޯނާ އަށް ކުޅެމުން އަންނަ ސްޕެއިންގެ ޕެޑްރީ އަށް ވެސް ވަނީ އަނިޔާވެފަ އެވެ. އަނިޔާގެ ސަބަބުން ޕެޑްރީ ވެސް ބަދަލުކޮށްފައިވާއިރު، އޭނާ ދަނޑުން ފޭބީ ރޮމުންނެވެ. ޕެޑްރީގެ ބަދަލުގައި ކުޅެން ނިކުމެފައި ވަނީ ލަމީން ޔަމާލް އެވެ.

މި ދެ ކުޅުންތެރިންނަށް އަނިޔާވެފައިވާއިރު، އެއީ ބާސެލޯނާގައި އެންމެ އިސް ދައުރެއް އަދާ ކުރަމުން އަންނަ ދެ ކުޅުންތެރިންނެވެ. ބާސެލޯނާ އަށް ދެން ކުރިއަށް އޮންނާނީ ސްޕެނިޝް ލީގުގައި، މި މަހުގެ ނުވަ ވަަނ ދުވަހު މަޔޯކާއާ ދެކޮޅަށް ކުޅޭ މެޗެވެ. އޭގެ ފަހުން ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި އެ ޓީމު ނިކުންނާނީ އިޓަލީގެ ނަޕޯލީއާ ދެކޮޅަށެވެ.

އެންމެ ފަހުގެ ޗެމްޕިއަން ބާސެލޯނާ އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ކުޅުނު 27 މެޗުން 58 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ޖިރޯނާ އަށް 57 ޕޮއިންޓު ލިބޭއިރު، އެއް ވަނައިގައި ރެއާލް މެޑްރިޑު އޮތީ 66 ޕޮއިންޓާއެކު އެވެ.

Advertisement
އެންމެ ފަހުން އަޕްޑޭޓް ކުރީ: 2 މަސް ކުރިން
ރިވިއު ކުރީ: އަހްމަދު ދާއޫދު
0%
0%
0%
0%
0%
0%
ކޮމެންޓް