މަޖިލިސް އިންތިޚާބު ބާއްވާނެ ތާރީޚާމެދު އިލެކްޝަންސް ކޮމިޝަނުން (އީސީން) ނުރަސްމީ މަޝްވަރާތަކެއް ކުރިކަމަށް ރައީސް ޑރ މުޙައްމަދު މުއިއްޒު ވިދާޅުވެއްޖެއެވެ.
ރައީސް އެހެން ވިދާޅުވީ، ނ. ކެނދިކުޅުދޫގައި ވާހަކަ ދައްކަވަމުންނެވެ.
މަޖިލިސް އިންތިޚާބުގެ ތާރީޚާ ގުޅޭގޮތުން ދެއްކެވި ވާހަކަފުޅުގައި ރައީސް ވިދާޅުވީ، އިންތިޚާބު ބާއްވާނެ ތާރީޚާ ގުޅޭގޮތުން ކޮމިޝަނުން ނުރަސްމީކޮށް ރައީސް އަރިހުގައި އެއްސެވި ކަމަށެވެ. އެއީ ދުވަސްކޮޅެއް ކުރިން ހިނގި ކަމެއްކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ، އޭރު ކޮމިޝަނުގައި އެދިވަޑައިގެންފައިވާނީ، ޤާނޫނާއި ޚިލާފު ނުވާނަމަ، ރޯދައިގެ ކުރިން އިންތިޚާބު ބޭއްވުމަށް ކަމަށެވެ. ވުމާއެކު ކޮމިޝަނުން އޭރު މަޖިލީހުގައި އެދުނުކަމަށްވެސް ރައީސް ވިދާޅުވިއެވެ.
އަޅުގަނޑު އިލެކްޝަންސް ކޮމިޝަނަށް، އެބޭފުޅުން ނުރަސްމީކޮށް އަޅުގަނޑު ގާތުގައި އެއްސެވީމާ އަޅުގަނޑު ދެންނެވިން، މިއީ ކުޑަ ދުވަސްކޮޅެއް ކުރިން ހިނގި ކަމެއް މިއީ، އަޅުގަނޑު ދެންނެވިން އަޅުގަނޑު އެދެމޭ ތިޔަ ބޭފުޅުންނަށް ވާން އޮތިއްޔާ ޤާނޫނުއަސާސީއާ ޤާނޫނާ ޚިލާފު ނުވަންޏާ ރޯދައިގެ ކުރިން އިންތިޚާބު ބާއްވަދޭށޭ، އެއް ދުވަސްކުރިން ވިޔަސް ހެވޭ އިންތިޚާބު ބާއްވަދޭށޭ، ދެން އެބޭފުޅުން އެދުނީ މަޖިލީހުގައި، މަޖިލީހުގައި މި އޮތީ އެމްޑީޕީގެ މެޖޯރިޓީރައީސް ޑރ މުޙައްމަދު މުއިއްޒު
އެކަމާ ގުޅޭގޮތުން ރާއްޖެއެމްވީން ސުވާލުކޮށްލުމުން އީސީގެ މެމްބަރަކު ވިދާޅުވީ، އީސީން ރައީސާ އެފަދަ މަޝްވަރާއެއް ކުރައްވާފައިވާކަމުގެ މައުލޫމާތެއް ލިބިވަޑައިގެންފައި ނެތް ކަމަށެވެ.
އިންތިހާބުތަކާއި ބެހޭ އާންމު ގާނޫނަށް 5 ވަނަ އިސްލާހު ގެނައި ބިލު، ރައްޔިތުންގެ މަޖިލީހުން ވަނީ 11 ފެބްރުއަރީ 2024 ވަނަ ދުވަހު ފާސްކޮށްފައެވެ. އޭގައި ބަޔާންކޮށްފައިވަނީ މަޖިލިސް އިންތިޚާބު ބާއްވާނީ ރޯދައިގެ ފަހުންކަމަށެވެ.
ރައްޔިތުންގެ މަޖިލީހުގެ އިންތިހާބު ރޯދަމަހާއި ދިމާވާތީ ރޯދަ މަހުގެ 10 ދުވަސް ފަހުން އިިންތިހާބު ބާއްވަންޖެހޭ ގޮތަށް ގާނޫނު އިސްލާހު ކޮށްފައިވަނީ ދިވެހި ރައްޔިތުންނަށް ރޯދަ މަހު އިންތިހާބު ބޭއްވުމުން ދިމާވާނެ ދަތިތަކަށް ހައްލެއް ހޯދުމަށް ކަމަށް މަޖިލީހުން ބުނެފައިވެއެވެ.
