ގައުމީ ޓީމަށް ކުޅުން ހުއްޓާލައިގެން ހުރި ޖަރމަނީގެ މިޑްފީލްޑަރ ޓޯނީ ކްރޫސް ނިންމުން ބަދަލުކޮށް, އަލުން ގައުމީ ޓީމަށް ކުޅެން ނިންމައިފި އެވެ.
2021 ވަނަ އަހަރުގެ ޖުލައިމަހު ގައުމީ ޓީމަށް ކުޅުން ހުއްޓާލިކަން އިއުލާނުކުރި މިޑްފީލްޑަރ އަލުން ގައުމީ ޓީމަށް ކުޅެން ނިންމީ މިއަހަރު އަމިއްލަ ގައުމުގައި އޮންނަ ޔޫރޯ ފުޓްބޯޅަ މުބާރާތުގައި ކުޅުމަށެވެ. ރެއާލް މެޑްރިޑްގެ މިޑްފީލްޑަރ އެނބުރި އަންނަން ނިންމީ ގައުމީ ކޯޗު ހޫލިއަން ނާގެލްސްމަންއާ މަޝްވަރާ ކުރުމަށްފަހު އެވެ. ކްރޫސް އިންސްޓަގްރާމްގައި ކުރި ޕޯސްޓެއްގައި ބުނީ އަންނަ މާރޗް މަހުން ފެށިގެން އަލުން ގައުމީ ޓީމަށް ކުޅޭނެ ކަމަށެވެ. އެއީ ކޯޗުގެވެސް އެދުމަށް ނިންމި ނިންމުމެއްކަމަށް 34 އަހަރުގެ މިޑްފީލްޑަރ ބުނެފައި ވެއެވެ.
ކްރޫސް ވަނީ 2014 ވަނަ އަހަރު ޖަރުމަނާއެކު ފީފާ ވަރލްޑްކަޕް ކާމިޔާބުކޮށްފައެވެ. 2010 ވަނަ އަހަރުގެ މުބާރާތުގައި ތިންވަނަ ހޯދި ޓީމްގައި އަދި 2014 ވަނަ އަހަރު ޔޫރޯ ސެމީފައިނަލަށް ދިޔަ ޓީމްގައިވެސް ކްރޫސް ހިމެނެއެވެ. ކްލަބް ފުޓްބޯޅައިގައި ބުންޑަސް ލީގާއި, ސްޕެނިޝް ލަލީގާ ކާމިޔާބުކުރިއެވެ. ކޮންމެ ލީގެއް ތިންފަހަރު ކާމިޔާބުކުރި އެވެ. އަދި ޗެމްޕިއަންސް ލީގު 5 ފަހަރު ވަނީ ކާމިޔާބުކޮށްފައެވެ.
ޔޫރޯ ޗެމްޕިއަންޝިޕް ފަށާނީ މިއަހަރުގެ ޖޫން މަހުއެވެ.
