ފިއުލް ސަޕްލައި މޯލްޑިވްސް (އެފްއެސްއެމް) ގެ މުވައްޒަފަކު އުޅަނދަކަށް އިތުރަށް ތެޔޮ އެޅި މައްސަލައަކާ ގުޅިގެން އޭނާ ވަޒީފާއިން ވަކިކުރީ ރަނގަޅަށްކަމަށް ދިވެހިރާއްޖޭގެ ހައިކޯޓުން ޙުކުމްކޮށްފިއެވެ.

އޭނާއަކީ 2019 އިން ފެށިގެން ފިއުލް ސަޕްލައިސް މޯލްޑިވްސްގެ ބާރޖު ކެޕްޓަނެއްގެ ގޮތުގައި ވަޒީފާ އަދާކުރަމުން ދިޔަ މީހެކެވެ.

އޭނާ ވަޒީފާއިން ވަކިކޮށްފައިވަނީ 2020 ވަނަ އަހަރުއެވެ. އެއީ އުޅަނދަކަށް ތެޔޮ އެޅުމަށްފަހު އިތުރަށް ތެޔޮ ދޫކޮށްފައިވާކަމަށް ތުހުމަތު ކުރެވޭ މައްސަލައަކާ ގުޅިގެންނެވެ.

މި މައްސަލައިގައި އެފްއެސްއެމްއިންވެސް ބުނެފައިވަނީ މިއީ 08 ޖުލައި 2020 ގައި 10,000 (ދިހަހާސް) ލީޓަރު ތެޔޮ ސަފާރީއަކަށް ޑެލިވަރީ ކުރިއިރު 2,500 (ދެހާސް ފަސްސަތޭކަ) ލީޓަރު ތެޔޮ މަދުވާކަމަށް ބުނެ ސަފާރީ ހިންގާ ކުންފުނިން ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑްއަށް އީމެއިލްގެ ޒަރިއްޔާއިން ޝަކުވާއެއް ހުށަހެޅުމުން ބެލި މައްސަލައެއް ކަމަށެވެ.

އޭރު ތެޔޮ މަދުވާކަމަށް ބުނުމުން އޭނާ އިތުރަށް 2500 ލީޓަރު ތެޔޮ އަޅާދީފައިވާކަމަށާއި، އޭގެ ކުރިންވެސް އެކަން ތަކުރާރުވެފައިވާކަމަށް ސަފާރީ ހިންގާ ކުންފުނިން ފޮނުވި އީމެއިލްގައި ބަޔާންކޮށްފައިވެއެވެ.

މި މައްސަލައިގައި އޭނާ ކުންފުނީގެ އޮފީހަށް ގެންގޮސް ބަޔާނެއް ނަގައި، ވަކި ގޮތެއް އަންގަންދެން ވަޒީފާގެ މަސްއޫލިއްޔަތުން ދުރުކުރުމަށް ނިންމާފައިވާކަން ލިޔުމުން އަންގާފައިވެއެވެ. އޭރު 9 މަސް ވަންދެން އޭނާ ވަޒީފާގެ މަސްއޫލިއްޔަތު ތަކުން ދުރުކޮށްފައި ހުއްޓެވެ.

އޭނާގެ ފަރާތުން ދިން ބަޔާނުގައި ބުނެފައިވަނީ، ތެޔޮ މަދުވާކަމަށް ޝަކުވާ ކުރުމުން ބެލި ބެލުމުން ތެޔޮ ދޫކުރަން ފެށުމުގެ ކުރިން ބާޖުގެ ހޮޅި ފިލް ނުކޮށް ތެޔޮ ދޫކުރެވިފައިވާކަން އެނގުނުކަމަށެވެ.

އެ ޝަކުވާ އޭރު ސަފާރީއިން ކުރި ނަމަވެސް އެކަން ލޮޖިސްޓިކް ޑިޕަރޓްމަންޓަށް އޭނާ އަންގާފައެއް ނުވެއެވެ.

އެއަށްފަހު އޭނާ ވަޒީފާގައި އިތުރަށް ބަހައްޓައިފިނަމަ ކުންފުންޏަށް ގެއްލުންތަކެއް ލިބިދާނެކަމަށް އެކަށީގެންވާ ހަމަތަކުން ޤަބޫލުކުރެވޭތީކަމަށް ބުނެ ވަޒީފާއިން ވަކިކުރިކަމުގެ ލިޔުން ވަނީ ދީފައެވެ.

މި މައްސަލަ އޭނާގެ ފަރާތުން ވަޒީފާއާ ބެހޭ ޓްރައިބިއުނަލްއަށް ހުށަހެޅުމުން ޓްރައިބިއުނަލްއިން ނިންމާފައިވަނީ އޭނާ ވަޒީފާއިން ވަކިކޮށްފައިވަނީ އެކަށީގެންވާ ސަބަބެއް އޮވެގެންކަން ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑުން ސާބިތުކޮށްދީފައިވާ ކަމަށާއި، އެހެންކަމުން އޭނާ ވަޒީފާއިން ވަކިކުރުމުގައި ޤާއިމުކުރަންޖެހޭ މައުޟޫޢީ އަދުލުވެރިކަން ޤާއިމުކޮށްފައިވާ ކަމަށެވެ.

އެހެންނަމަވެސް އޭނާގެ މައްސަލަ އިދާރީ ގޮތުން ތަހުޤީޤު ކޮށްފައިވާކަން ސާބިތުކޮށްދިނުމުގެ ބޭނުމަށް ތަހުޤީޤު ރިޕޯޓެއް ތައްޔާރުކޮށްފައިވާކަން އެނގެން ނެތުމުން، އިޖުރާއީ އަދުލުވެރިކަން ޤާއިމުކޮށްފައިވާކަމަށް ބެލެވެން ނެތްކަމަށް ބަޔާންކޮށް ޓްރައިބިއުނަލްއިން ވަނީ އޭނާއަށް ބަދަލު ދިނުމަށް އަންގާފައެވެ.

ގެއްލުމުގެ ބަދަލުގެ ގޮތުގައި 17،660 ރުފިޔާ ނަގައިދިނުމަށް ޓްރައިބިއުނަލްއިން ވަނީ ނިންމާފައެވެ.

އެ ނިންމުން ހައިކޯޓުގައި އިސްތިއުނާފު ކުރުމުން ހައިކޯޓުން ބުނީ، މި މައްސަލައާ ގުޅިގެން ކުންފުނިން އަމަލުކޮށްފައިވާ ގޮތަށް ބަލާއިރު، އިދާރީ ތަހުގީގެއް ހިންގާފައިވާކަން އެނގެން އޮންނަ ކަމަށެވެ.

ވުމާއެކު ހައިކޯޓުން ވަނީ ޓްރައިބިއުނަލްގެ ނިންމުން ބާތިލުކޮށް، އޭނާ ވަޒީފާއިން ވަކި ކުރުމުގައި މައުޟޫއީ އަދި އިޖުރާއީ އަދުލުވެރިކަން ޤާއިިމު ކޮށްފައިވާކަަމަށް ނިންމާފައެވެެ.